Shillong, Nohprah 01
Ka kynhun ïalehkai ka Jylla kaba la wan ha ka kyrdan ba-ar ha ka aïom ba la dep, ka la shah pynngat hapoh ka thup jong ka Group-A na ka bynta ka wat kaba khatduh jong ka 77th National Football Championship (Santosh Trophy 2023-24).
Kane ka la wan hadien ba ka All India Football Federation (AIFF) ka la pynbna ïa ka prokram ïalehkai ha ka sngi Palei.
Ïa ki tarik ïalehkai na ka bynta ka Santosh Trophy la buh ban pynlong naduh 21 tarik u Rymphang haduh 9 tarik u Lber jong u snem ban wan ha Arunachal Pradesh.
Ha kane ka lympung ki la don 12 tylli ki kynhun ki ban ïashim bynta kaba la phiah ha ar tylli ki group, kaba mut mar hynriew tylli ki kynhun. Ki kynhun kiba la khur jingjop ha ki jingïalehkai (group stage) ki kynthup ïa ka Goa, Delhi, Manipur, Assam, Services bad ka Maharashtra, kumjuh ki lai tylli ki kynhun ba kynsai kiba wan ba-ar (Kerala, Mizoram bad ka Railways), lem bad lai tylli ki kynhun kiba la ïoh rung lypa kata ka Arunachal Pradesh (kaba dei ka jylla ban pynlong ïa kane ka jingïakhun), kumjuh ka lahduh jong ka aïom ba la dep ka Karnataka bad ka Meghalaya.
Kane ka long ka sien kaba nyng-kong eh naduh ba la pynlong ïa kane ka lympung ha u 1941, ïa ka Santosh Trophy yn pynlong ha Arunachal Pradesh. Kane ka kynhun ka la don ha ka Group-A. Ïa kane ka rukom pyniaid thymmai jong kane ka lympung yn pynïar ha ka ‘knockout stage’, ha kaba ki saw tylli ki kynhun ki ban wan kham shakhmat na kawei pa kawei ka group kin ioh rung sha ka quarter-final.
U Acting Secretary General ka AIFF u Satyanarayan M u la ong, “Ka Santosh Trophy ka long kaba kham kyrpang namar ngi la wanrah ïa kane ka lympung ha ka sien nyngkong ha Arunachal Pradesh. Nga ai khublei ia u President jong ngi u Kalyan Chaubey, kumjuh u Treasurer u Kipa Ajay lem bad u Myntri Rangbah ka Arunachal Pradesh u Pema Khandu na ka bynta ban pynlong ïa ka wat kaba khatduh jong ka Santosh Trophy.”
Ki kynhun ïalehkai kiba la don ha ka Group-A ki long ka Arunachal Pradesh, Meghalaya, Goa, Assam, Services bad ka Kerala. Ha ka Group-B ki long ka Karnataka, Maharashtra, Delhi, Manipur, Mizoram bad ka Railways.
