Khliehriat, Nohprah 01
Ka Rymbai Shkenshynriah bad Moolamanoh ki la ïasam mar shi point ha ka lympung ïalehkai Super Division Football Tournament ba la pynïaid da ka East Jaiñtia Hills District Football Association (EJHDFA), hadien ba ki la ïakhaid mar 2-2 kol ha ka sngi Thohdieng ha madan Artificial Turf Diengshynrum, Khliehriat. Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang. Ka Rymbai Shkenshynriah ka la ïoh ban thep kol nyngkong lyngba u Ribha Dkhar ha ka minit kaba 28. Une u rangïalehkai shakhmat u la pynbud ïa ka kol ba ar ha ka minit kaba 33. Hadien saw minit ka Moolamanoh SC ka la lah ban pynphai kylla shi kol lyngba u Kiming Dkhar. Kane ka kynhun ka la lah ban pynïakhaid lyngba ka jingïarap pynthep da u rangïalehkai ka Rymbai u Jesly Sungoh ha ka minit kaba 90+1.
Haba phai sha kawei pat ka jingïakhun kaba ar hapdeng ka Rymbai Wahshnong bad ka Khliehriat West YWSC ki la ïakhaid mar 1-1 kol. Ïa ka kol jong ka Rynbai Wahshnong la thep da u Pyndap Bareh ha ka minit kaba 42, hynrei ka Khliehriat West ka la lah ban pynïakhaid kylla lyngba penalty ba la shut da u Sandy Kassar ha ka minit kaba 54.
