Shillong, Nohprah 01
Ka kynhun ïalehkai ka Jylla ka la mad ïa ka jingshah rem da 30 run ha ka Services ha ka Vijay Hazare Trophy (men’s one day tournament) ha ka sngi Thohdieng ha Jaipur.
Ka Services da kane ka jingjop ka la wan ha ka kyrdan ba-ar ha ka Group-B jong kane ka lympung.
Ka Meghalaya ha kane ka jingïakhun ka la pyrshang ban ïakhun tyngeh ha kaba u Dippu Ch Sangma u la lah ban kawang bol bha bad u Kishan Lyngdoh ha ka rukom tied.
Ka Meghalaya kaba la jop ïa ka kynting pisa, hynrei ka la shimti ban kawang bol shwa. Te kumta ka Services ka la lah ban kamai 236/9 ha ki 50 over. Hynrei ki nongtied ka Meghalaya ki la shah pynkhyllem lut baroh na ka bynta ban kamai tang 207 run ha ki 48.3 over.
Ha kane ka jingïakhun ka Meghalaya ka la lah ban pynduna ïa ka Services na ka bynta ban kamai tang 20/3, ha kaba ïa ki ar wiket la khur da u Dippu (4/38 in 10 overs) bad ïa kawei pat la ïoh ban khur da u Md Nafees (3/48 ha ki 10 over).
Te kumta ka Services ka la ïai bteng ha ka ban shah pynhap wiket ha kaba ka la ïoh 120/7 hashwa ba kan khur ïa ki shteng spah run lyngba u AP Sharma (61) bad u PS Poonia (51), hynrei kine baroh ar ngut ki la shah pynhap wiket noh ha u Nafees.
Ïa kiwei pat ki wiket la lah ban khur da u Raj Biswa (1/30 ha ki 6 overs) bad u Swarajeet Das lyngba ka run out.
Ka Meghalaya ka la pyrshang ban ïalehkai bha ha ka ban tied ha kaba u Raj, uba la tied 21 run lem bad u Nakul Verma (guest player) uba la tied 23 na ki 21 bol. Kumjuh u Kishan u la lah ban tied ïa ka shiteng spah run kaba 74 na ki 89 bol, kynthup ïa hynñiew tylli ki ‘four’ lem bad u Tanmay Mishra, u la tied 52 run na ki 83 bol, kynthup ïa hyñiew tylli ki ‘four’.
Hadien ka Meghalaya ka la lah ban kynjoh sha ki 162/3, ha kaba ka dangsah sa 75 run ban kamai na ki 16 over. Hynrei u, Poonia (4/35) bad u Sharma (3/30) kim shym la lah ban ïalehkai bha na ka daw ka jingïalehkai bha ki nongkawang bol ka Services bad ha kaba kut ka Meghalaya ka la lah ban kamai tang 207 run hashwa ba la shah pynhap wiket ki nongtied.
Kane ka kynhun ïalehkai ka Jylla kan pynkhreh ïa kawei pat ka jingïakhun pyrshah ïa ka Manipur ha ka Sngi U Blei.
