Shillong, Nohprah 01
Ka Sorkar Jylla ka dang hap ban peit bniah ïa ka hukum kaba la pynmih da ka Supreme Court kaba la ai ïa ka rai ba ka Diploma in Elementary Education (D.El.Ed) kaba dei ka jingai jinghikai lyngba ka Open and Distance Learning jong ka National Institute of Open Schooling (NIOS) ka dei ka bym ïahap na ka bynta ban leit long nonghikai.
Ïa kane ka rai la pynmih da ka Supreme Court ha ka 28 tarik Naiwieng haba ka shim ban bishar ïa ka mukotduma kaba ka Sorkar Uttarakhand ka la mudui sha Supreme Court pyrshah ïa ka rai jong ka High Court kaba la shah ban kynthup lang ïa kito kiba la pyndep ïa ka D.El.Ed (Diploma in Elementary Education) jong ka NIOS ha ka jingkhot ban thungkam nonghikai kumba 2,648 tylli ki kam hikai ha Uttarakhand.
Haba ïakren bad u Myntri ka tnat pule puthi ka Jylla, u Rakkam A Sangma u la ong ba kane ka hukum kaba la pynmih da ka Supreme Court ka dei kaba treikam ha baroh kawei ka ri bad hap ban pule ïa kane ka rai ha kano ka rukom kan ktah ne kan nym ktah ïa ki nonghikai kiba la pyndep ïa ka D.El.Ed lyngba ka NIOS.
Ka Ïingbishar ka la ong ba ka D.El.Ed lyngba ka NIOS kaba 18 bnai bad ka D.El.Ed kaba 2 snem kim lah satia ban ïaryngkat.
Ha kajuh ka por, ka Supreme Court ka la ong ba dang lah ban kyrpad biang kham shalor pyrshah ïa kane ka rai.
Lah ban kdew hangne ba ki don da ki phew hajar ngut ki nonghikai ha Meghalaya kiba la pyndep ïa ka D.El.Ed lyngba ka NIOS bad bun ruh kiba la ïoh kam nonghikai ha ki skul Lower Primary kiba don ha kylleng ka Jylla.
U Rakkam u la ong ba ha u snem 2014-2015 ki don ki nonghikai kiba la leh ïa ka D.El.Ed ban shah hikai lyngba ka NIOS.
Namarkata, u la ong ba ka Sorkar Jylla kan pule bha ïa kane ka rai jong ka Supreme Court da kaba shim ki lad ki lynti ki ban nym long ka jingduhnong ïa ki nonghikai kiba la pyndep ïa ka D.El.Ed lyngba ka NIOS bad kiba la shah thung ruh kum ki nonghikai.
