Shillong, Nohprah 03
Ka kynhun ïalehkai kriket U-19 ka Meghalaya ka la lah ban pynliem noh ïa ka Sikkim da 2 wiket ha jing-ïalehkai jong ka lympung Cooch Behar Trophy kaba la kut ha ka Sngi U Blei.
Kane ka jingïalehkai ka la sdang ha ka Sngi Thohdieng ha Rangpo, Sikkim. Ka Meghalaya ka -ba la shah rem noh ha ki ar tylli ki jingïakhun kiba la dep ha la ïing, ka la leh bha ha kane ka jing-ïakhun ban wad jingjop.
Haba phai sha ka jing-ïalehkai, ka Sikkim kaba la jop ka jingkynting pisa ha ka sngi sdang, ka la tied nyngkong, ha kaba ki la lah ban tied 183 run bad hap lut baroh ki wiket hynrei ki la lah ban tam pat da 38 run hadien ba ki nongtied ka Meghalaya ki la lah ban tied tang 145 run bad hap lut ki wiket ha ka pali kaba nyngkong.
Haba bteng ïa ka jing-tied ha ka pali kaba ar, ki nongtied ka Sikkim kim shym la lah satia ban shan hakhmat ki nongkawang bol ka Meghalaya bad ki la lah ban kamai tang 139 run bad hap lut ki wiket baroh, kaba la pynlong ruh ïa ka Meghalaya ba kan donkam pat ban tied 178 run ban jop syndon ïa kane ka jingïalehkai, ha kaba ka Meghalaya ka la lah ban kot hadien ba ka la hap haduh 8 wiket bad jop ïa kane ka jingïakhun da 2 wiket.
Ha ka pali kaba nyngkong, u nongkawang bol ka Meghalaya u Shavian Blah u la khur haduh 4 wiket bad ai 69 run na ki 19 tylli ki over. Haba tied ha ka pali ba nyngkong, ka Meghalaya ka la don ha ka jingma bad la i ba kan nym lah ban tied palat ïa ka 100 run hadien ba ki la duh 8 wiket bad kamai tang 82 run hynrei ka jinglah ban ïalehkai bha bad kamai run da u Aadnan uba la tied 80 run marwei ka la pynlong ïa ka Meghalaya ba kan lah ban kamai 145 run.
Kiwei ki nongkawang bol ka Meghalaya kiba la khur wiket ha ka pali ba nyngkong ki long u Kishlay Vishlux (2/24 na ki 6 over) bad u Charm Marbaniang (2/30 na ki 6 over) katba u Banialam Mylliemngap bad u Angkit Tamang ki la khur mar shi wiket.
Hadien ka jingtam da 38 run, ka Sikkim ka la dei ban leh bha ha ka pali ba ar, hynrei bun ki nongtied kim shym la lah ban shan bad duh noh ïa la ka jong ka wiket bad dei tang 3 ngut ki nongtied kiba la lah ban tied palat ïa ka 10 run. Watla ka Sikkim ka la duh 8 wiket ha ka por ba ka la kamai 76 run hynrei ka Meghalaya kam shym la lah ban pynkut kloi, kaba la ailad ïa ka Sikkim ban kamai sa 63 run.
U Angkit u la khur 3 wiket, katba u Avinash Rai, u Kishlay bad u Charm ki la ïoh mar 2 wiket.
Haba buh ka thong kaba 178 ban jop, ka Meghalaya ka la sdang ha ka rukom kaba paka, ha kaba u Angkit u la tied 56 run bad u Manthan Dey 38 run bad u Pushkar u la kamai 35 run, hynrei hadien ka jinghap wiket jong kine, kiwei kim shym la lah leh eiei ha kaba ka la duh haduh 4 wiket bad kamai tang 4 run, kata ka la duh 4 wiket na ka 164 run ban poi sha ka 170 run. Hynrei da ka jinglah ban tied bha jong u Avinash uba la kamai 27 run bad u Charm uba la tied 6 run ka la ïalam ïa ka Meghalaya sha ka jingjop.
Hadien kane ka jingjop, mynta ka Meghalaya kan hiar sha Anand, Guja-rat, ban ïakhun pyrshah ïa ka Arunachal Pradesh kaba la pynlong ïa ki jingïalehkai ha la ïing ha kane ka jaka ha kane ka aiom kaba mynta bad kane ka jingïalehkai kan sdang ha ka 8 tarik mynta u bnai.
