Shillong, Nohprah 03
Ka Meghalaya ka la khur jingjop kaba nyngkong ha ka lympung Vijay Hazare Trophy Domestic Men’s One Day Tournament ha Jaipur da kaba pynliem noh ïa ka Manipur da 33 run ha ka jingïalehkai kaba la long ha ka Sngi U Blei.
Kane kan dei ruh ka jingjop kaba nyngkong na ka bynta ka kynhun ïalehkai Senior jong ka Meghalaya ha kane ka aiom, watla ka la shah rem noh da khyndiat run ha kiwei pat ki jingïalehkai pyrshah ïa ki kynhun kiba kham khlaiñ bor.
Haba phai sha ka jingïalehkai, ka Meghalaya kaba la jop ïa kynting pisa ka la ailad shwa ïa ka Manipur ban tied nyngkong. Ka Manipur haba wan ban tied ka la kamai haduh 248 run na ki 50 over bad hap 9 wiket. Haba beh ïa ka thong, ki nongtied ka Meghalaya ki la ïoh ka jingsdang bad ka jingïaid lynti kaba paka. Ha ka por ba ki la kamai 171 run na ki 34 over bad hap 3 wiket, la hap ban pynsangeh noh ïa ka jingïalehkai namar ka jinghap slap bad haba la ïaid katkum ka VJD method (ka rukom pynïaid katkum ka Duckworth-Lewis), ka Meghalaya ka la long hakhmat ha ka jingdonkam run ha kane ka khyllip mat, kata da 33 run.
Na ka bynta ka Meghalaya, u ‘guest player’ u Rajesh Bishnoi uba la kawang 10 over u la khur 3 wiket bad ai 49 run, u Swarajeet bad u Md Nafees ki la khur mar 2 wiket.
Baroh san ngut ki nongtied ka Meghalaya ki la lah ban ïalehkai bha bad kamai run bun, kata u ‘guest player’ u Nakul Verma u la tied 49 run, u Raj Biswa u la kamai 24 run, u Swarajeet u la kamai 27 run, u Jaskirat Singh Sachdeva u la kamai 23 run bad u Tanmay Mishra u la kamai 37 run.
Ka jingïalehkai ba khatduh jong ka Meghalaya ha kane ka lympung kan long pyrshah ïa ka Hyderabad ha ka sngi Ba-ar.
