Chennai, Nohprah:
Ka Madras High Court ka la pynsangeh shwa ha kaba ïadei bad ka jingkhot hajir da ka Enforcement Directorate (ED) sha kiba bun ki District Collector ha Tamil Nadu ha kaba ïadei bad ka jingtih beaiñ ïa ki marpoh khyndew.
Ka kynhun nongbishar jong u Justice S S Sundar bad Justice Sunder Mohan, haba ka la khmih bniah halor kine ki jingkynnoh, ka la pynpaw ïa ka jingsngew artatien shaphang ki jingpyntreikam jong ka kynhun ED ha kaba ïadei bad kane ka bynta.
“Ngi la khmih bniah hashwa ha kaba ïadei bad ka jingkhot hajir ha kaba la ong ba kam hap hapoh ka jingkhmih jong ka kynhun ED,” la ong ki nongbishar, ha kaba la bynrap shuh shuh da kaba ong ba kine ki jinglong jingman ki hap hapoh ka jingkhmih bniah bad ka jingïakren kaba dang ïaid shakhmat.
Kane ka hukum ka la long hadien ba ka la don ka jingkyrpad ba la phah lang da ka sorkar jylla bad ki Collector kiba la pynibor pyrshah halor ka jingkhot hajir bad ka jingkhot ban shah kylli jingkylli jong ka kynhun ED na ka bynta ban tohkit bniah halor ki kam beaiñ khlem da pyntip shwa sha ka sorkar jylla.
Ka ïingbishar ka la pynshai da kaba ong ba ka la phah sangeh shwa ha kaba la ai jingbit tang ban pyntreikam halor ka jingkhot hajir bad ym ban ïaid shakhmat ha kaba ïadei bad ka jingtohkit halor ki jingjia beaiñ kiba la mih na ki par tih shyiap.
Hashwa kane, u Additional Solicitor General A R L Sundaresh, uba la mihkhmat ïa ka kynhun ED, u la pyntikna hakhmat ka ïingbishar ba kam dei ban don kano kano ka jingpynshitom pyrshah ïa ki heh ka kynhun khot hajir khlem da ai shwa da ka jingthoh.
Kumba ka la long ha ka jingkhot hajir jong ka kynhun ED kaba la long ha ka 17 tarik, Nailur, ka la hukum sha ki District Collector jong ka Ariyalur, Karur, Vellore, Thanjavur, bad Tiruchi ba ki dei ban leit mih markhmat, ha ryngkat ki Aadhaar Card jong ki bad ban phah ruh ïa baroh ki kot ki sla ha kaba ïadei bad ki jingpyntreikam hapoh ka par tih shyiap kiba don ha ki distrik jong ki.
Ka sorkar jylla ka la sngew bitar halor ka jingleh jong ka kynhun ED, ha kaba ka la leit mih sha ka High Court ha kaba la ong ba kine ki jingkhot hajir ki la long tang kumno ban leh donbor ne pynkhlemraiñ ïa ki bor sorkar ha ka jylla.
Ka jylla ka la ong shuh shuh ba ki kam beaiñ kiba mih na ki par tih shyiap kim dei ban shah pynngat hapoh ka Prevention of Money Laundering Act (PMLA), ha kaba kane ka la hap shabar jong ka jingtuklar jong ka kynhun ED.
