Nongstoiñ, Nohprah 03
Ka kynhun ïalehkai jong ka Mawlarshong Sports Club bad ka Tiehsaw Pengkyllut ki la hun noh ban shu ïasam mar shi point ha ka lympung NDSA Premier League Football Tournament 2023 hadien ba ka jingïalehkai ka la kut noh ha ka jingïakhaid.
Haba phai sha ka jingïalehkai kaba la long ha ka sngi Saitjaiñ ha madan NDSA ha Nongpyndeng, ka jingïakhun hapdeng ka Mawlarshong pyrshah ïa ka Tiehsaw ka la long kaba ïakhaid bad itynnad shibun hynrei haduh ba kut jong ka jingïalehkai, ym shym la don satia mano mano ruh kiba la lah ban pynkhih jar.
Haba phai pat sha ka jingïalehkai jong ka First Division kaba la long ha kane kajuh ka sngi, ka kynhun ïalehkai jong ka Porniangkhong Sports Club kala ïoh ban khur ïa ka jingjop hadien ba ka la lah ban pynliem noh ïa ka Ramsngiwar Sports Club da 3-1 kol.
Na ka liang ka Football Committee jong ka NDSA kala pyntip ruh ba ka jingïalehkai ha ka 4 tarik mynta u bnai kan long hapdeng ka Jaidoh YSA pyrshah ïa ka Mawiong Pyndengrei Sports Club ha ka por 12.05 mynsngi katba ha ka Super Division pat ka jingïalehkai kan long hapdeng ka Mawkawah Sports Club pyrshah ïa ka Khliehmawlieh Youth Club ha ka por 2 baje mynsngi.
