Shillong, Nohprah 03
Ka kol kaba la ïoh ban thep da u Daniel Gon-calves ha ka minit shwa ban wai artad ka jingïa-lehkai ka la pynlong ïa ka Shillong Lajong Football Club ban ïoh khur 1 point ha ka jingïakhun pyrshah ïa ka Rajasthan United Football Club ha ka lympung I-League.
Haba phai sha ka jingïalehkai kaba la long ha Hyderabad ha ka Sngi U Blei, dei ka Rajasthan United kaba la ïoh khyrwit kol nyngkong lyngba u Richardson Kwaku Denzell tang ha ka minit kaba 9 bad haduh ba kut ka kylla step ruh ka Rajasthan ka la tam da 1-0 kol.
Haba bteng ïa ka kylla miet, watla ki rangïalehkai ka Shillong Lajong ki la ïakhun tyngeh hynrei kim shym la lah satia ban pynkhih jar. Kumta la i kumba kan mad ïa ka nam rem kaba nyngkong jong kane ka lympung. Dei tat ha ka minit kaba 90+7 ba u Daniel Goncalves u la ïoh pynphai ïa kane ka shi kol bad ruh ban pynïoh 1 point ïa ka Lajong.
Lyngba kane ka jingïa-khaid, ka la pynlong ruh ïa ka Shillong Lajong ba kan nym pat shah rem satia ha kane ka lympung lem bad ka Mohammedan Spor-ting.
Ka Shillong Lajong FC ka dang ïai neh ha ka kyrdan kaba saw hadien ba ka la ïoh ban khur 13 point na ki 7 tylli ki jingïalehkai, kata ka la jop 3 sien bad ïakhaid 4 sien.
Hadien kane ka jingïalehkai, mynta pat ka Shillong Lajong FC kan pynkhreh ban ïakhun pyrshah ïa ka Churchill Brothers na Goa ka ban long ha ka 6 tarik mynta u bnai ha ka por 2 baje mynsngi ha madan SSA Stadium, Shillong.
