Shillong, Nohprah 03
Ka Mawtawar Sports Club ka la khur ïa ka jingjop katba ka Laitlyngkot Sports Club bad ka Nongkrem Sports Club ki la mad noh ka jingïakhaid ha ki jingïalehkai jong ka lympung SSA 2nd Division Football League 2023 kaba dang ïaid shakhmat mynta ha madan Polo.
Haba phai sha ka jingïalehkai kaba la long ha ka sngi Saitjaiñ ha madan ïalehkai jong ka SSA ha Polo, ka Mawtawar SC ka la lah ban pynliem noh ïa ka Sohiong Sports Club da 4-0 kol bad ïa kine ki kol jong ka Mawtawar la ïoh ban khyrwit da u Larrycarson Lyngdoh ha ka minit kaba 25, u Fedrick Lyngdoh ha ka minit kaba 29, u Teibhalang Kharpuri ha ka minit kaba 71 bad u Ronaldo Rangslang ha ka minit kaba 82.
Haba phai pat sha kawei ka jingïalehkai jong kane ka sngi, ka jingïakhun hapdeng ka Laitlyngkot SC pyrshah ïa ka Nongkrem SC ka la kut noh ha ka jingïakhaid, hadien ba ym shym la don satia mano mano ruh ki ban ïoh pynkhih jar haduh kaba kut.
Lashai ka sngi ka 4 tarik pat ki jingïalehkai ha ka lympung SSA 2nd Division Football League 2023, kata ha ka por 11.30 mynstep kan long hapdeng ka Pohkseh Sports Club pyrshah ïa ka Imson Sports Club bad ka jingïakhun kaba ar kan long ha ka por 2.30 nohphai sngi hapdeng ka Lumshyiap Sports Club pyrshah ïa ka Smit Sports Club.
