Tel Aviv, Nohprah:
U Secretary of State jong ka United States, u Antony Blinken ha ka Sngi Palei u la kyntu ia ka Israel ba kam dei ban thombor naphang ia ka Gaza namar kan wanrah jingma ia ki paidbah nongshong shnong kiba lui-lui bad kiba don ha kylleng ki bynta jong ka Gaza Strip. Ka US ka la kren ia kane ha ki khyndiat kynta shwa ba ka Israel kan bteng biang ia ka thma hadien saw sngi ba la sangeh iasiat katkum ka soskular bad ka Hamas.
Haba ai jingkren ha katei ka sngi, u Blinken u la ong ba ka Israel ka dei ban buh hakhmat ia ka jingma kaba ap ia ki paid nongshong shnong ka Palestine kiba don hapoh Gaza namar lada kan shu thombor naphang khlem jingisynei, ki ban shah ktah jur ki dei ki paidbah namar ki lehnoh ki la don na ka jaka kaba biang ba kin rieh bad iada ialade.
Ia kane, u Blinken u la kren hadien ka sngi ba khatduh jong ka jingsangeh thma hapdeng ka Israel bad ki lehnoh Hamas, ha kaba ka Hamas bad Israel ki la ioh ban pyllait mar kylliang ia bun ngut ki briew kiba ki la dep set bad rahbor baroh shi katta.
Namarkata ruh u Blinken u la ong ba ka jingpyrkhat naka bynta ki paidbah, ka long kaba kongsan tam ha kum kane ka por bad ka Israel ka dei ban pyrkhat lem ia ka kput bad kumjuh ruh ia ka jingim jong ki riew paidbah pat ha kajuh ka por.
Ha kajuh ka por ruh u Blinken u la ong, namar ka Israel ka don ka hok ban iada ia ka jingma kaba ap ia ki paidbah na ki kam thombor jong ki lehnoh Hamas. Bad kumta ruh ka Israel ka dei ban pyrkhat lem ia ki paid nongshong shnong ka Gaza kumba ka pyrkhat ia la ki jong ki paidbah hashwa ba kan leit pynhiar kput naphang ia ka Gaza.
