New Delhi, Nohprah:
Katkum ki khubor la ong ba ki heh ka tnat iada jong ka Israel ki la dep ioh jingtip bad ioh sabut lypa ia ki jingthmu jong ki lehnoh Hamas ban leit hiar thma ia ka Israel ha ka 7 tarik u Risaw. Pynban ka Israel kam shym poi pyrkhat ba katei kynhun lehnoh kan leh shisha noh ia kata.
Katkum ka kaiphod ba la ioh lum, la ong ba ki heh ka tnat iada jong ka Israel ki la dep ioh jingtip lypa halor katei ka jingthmu jong ki lehnoh Hamas la kumba shi snem hashwa ba kin hiar thma ia ka Israel ha une u Risaw ba la leit.
Hynrei, ha kitei ki kot- ki sla bad ki jingtip ba la ioh lum da ka Israel, ym shym la pynpaw pat ia ka tarik ne ka sngi ba ka Hamas kan leit hiar thma pyrshah ia ka Israel.
Katba, la ong ba ka Hamas ka la leit ban thombor ia ka Israel tang hadien katto-katne sngi ba ka Israel ka la dep ban soi ia ka jingiatrei lang bad ka soskular jingiasuk bad ka Palestine hadien da ki phew snem ba la iashrut bd iakynad bad ka Israel. Pynban la ong ba ka long kaba sniewbok haduh katta ba ka Palestine ka lah ban poi biang sha ki jingiakynad bad ka Israel hadien- habud tang namar jong katei ka thma ha kane ka por ba mynta.
Kumba la iohi ia kaba la jia ha kane ka por, ka Hamas ka la sdang ban hiar thma ia ka Israel dei ha ka 7 tarik u Risaw jong une u snem 2023, ha kaba da ki hajar ngut ki nong Israel ki la duh ei noh ia ka jingim ha katei ka por. Ym tang katta, hynrei ki lehnoh Hamas ki la rahbor ruh ia ki briew na Israel hadien ba ki la dep ban leit thombor bad pyniap dusmon ia ki paidbah nongshong shnong ka Israel haduh ha iing- ha iing khlem jing isynei wat ia ki khyllung- ki khynnah hynrei ki la mait naphang bad khrai khlieh naphang kat ia kiba don ha ka lynti iaid jong ki ha ka por ka jingleit hiar thma ia ka Israel.
Kumjuh ruh na ka liang jong ka Israel, naduh katei ka sngi bas-dang hiar thma ka Hamas, ka ruh da ka jingbitar khlem da pynslem ka la pynbna ia ka thma pyrshah ia katei ka kynhun lehnoh jong ka ri Palestine kaba la synshar hi ia ka nongbah Gaza Strip kaba long jong ka Palestine ha ki por ba la leit. Hadien ba ka la dep ban pynbna ia ka thma, ka Israel ka la ther bom khlem sangeh bad khlem jingmap sha kylleng ki bynta jong ka Gaza bad ha man ki jaka ba don ki ktem bad ki shlem treikam jong ki lehnoh Hamas bad ka Israel ka da smai ruh ba kan kput bad pynduh- pyndam syndon ia katei ka kynhun lehnoh Hamas, khnang ba kiwei ki ri ruh kin lait na ki jingma ba shyrkhei kiba ap na ki kam thombor jong katei ka kynhun lehnoh hadien-habud.
