Shillong, Nohprah 03
Ka kynhun ïalehkai U-16 ka Meghalaya ka la liem noh da 29 run ha ka Sikkim ha ka jingïalehkai kaba nyngkong jong ka lympung Vijay Merchant Trophy.
Kane ka jingïalehkai kaba la long ha Cuttack, ka la sdang ha ka sngi Thohdieng, ha kaba ka Meghalaya kaba la jop ka jingkynting pisa bad kam trai shwa ban kawang bol nyngkong.
Ka Sikkim haba tied nyngkong ka la kamai 197 run bad ha ka pali ba ar ka la kamai 114. Ka Meghalaya ha ka pali ba nyngkong ka la kamai 104 run bad 178 run ha ka pali kaba ar.
U Gaurav Jyoti Thakuria u la khur haduh 5 wiket bad ai 51 run na ki 16.2 over ha ka pali ba nyngkong, katba u Benedict Jones Makdoh u la khur 2 wiket bad ai 24 run na ki 9 over bad u Apandanka N Marak ruh u la khur 2 wiket bad ai 50 run na ki 22 over.
Ka Meghalaya ha ka pali kaba nyngkong kam shym la lah satia ban ïalehkai bha, bad la i kumba kan hap lut ki wiket tang hapoh ka 100 run hynrei ka jinglah ban tied bha jong u Heiyomiki Ryngkhlem uba la tied marwei 43 run ka la lah ban kyntiew ïa ka jingkamai run.
Ka Meghalaya ka la shah tam lypa da 93 run ha ka Sikkim ha ka pali ba nyngkong, ka la ïakhun tyngeh ha ka pali kaba ar bad ha kaba ki nongkawang bol jong ka, ki la lah ban tehlakam ïa ki nongtied ka Sikkim, kiba la lah ban kamai tang 114 run bad hap lut ki wiket. U Apandanka marwei u la khur haduh 6 tylli ki wiket bad ai 35 run na ki 10.1 over katba u Thakuria bad u Benedict ki la ïoh ban khur mar 2 wiket.
Ka thong ban jop ïa ka Meghalaya ka la long 208 run, hynrei ki nongtied ba hakhmat ki la duh noh kloi ïa la ki jong ki wiket hynrei ka jinglah jong u Dipayan Nandi, ban tied haduh 95 run na ki 194 tylli ki bol ka la ïarap ïa ka Meghalaya ban kiew ha ka jingkamai run hynrei ka jingbym lah jong kiwei pat ki nongtied ban neh slem hapdeng ka la pynlong noh ïa ka Meghalaya ha kaba kut ban duna da 29 run bad hap lut baroh ki wiket.
Hadien kane ka jingshah rem, ka Meghalaya kan pynkhreh pat mynta ban ïakhun pyrshah ïa ka Nagaland ka ban sdang naduh ka 6 tarik Nohprah.
