Bengaluru, Nohprah:
Ka sorkar Karnataka ka la pdiang bad mynjur na ka bynta ka jingtyrwa ban pyntreikam ïa ki 62 tylli ki karkhana kiba hap hapoh ka jingbei tyngka kaba kot sha ka T. 3,607.19 klur. Kane ka long halor ka jingthmu ban pynmih ïa kumba 10,755 tylli ki kam hapoh ka jylla.
Ka State Level Single Window Clearance Committee (SLSWCC), ba la lamkhmat da u Myntri jong ka Karnataka u MB Patil, u la pdiang na ka bynta ka jingpyntreikam ïa ki phra tylli ki Project kiba long T. 50 klur ha ka bei tyngka, ha kaba baroh ka la kot sha ka T. 2,088.44 klur.
Kine ki phra tylli ki Project kin sa pynmih ïa kumba 6,360 tylli ki kam. Ki nongbei tyngka ha kaba ïadei bad kine ki Project ki kynthup ïa ka Texcon Steels, Hundri Sugars and Ethanol Private Limited, Bren Life Sciences, Alpine Ethanol, Virupaksha Laboratories, bad ka Qualcomm India, napdeng kiba bun kiwei pat.
Napdeng ki 62 tylli kiba la buh jingtyrwa, 51 tylli ki project bei tyngka ki la hap hapoh ka jinglut kaba T. 15 klur haduh T. 50 klur.
Kine ki 51 tylli ki Project baroh ki kot haduh T. 941.40 klur, bad la khmih lynti ba kan sa lah ban pynmih kam na ka bynta ki 4,395 ngut ki briew ha ka jylla Karnataka.
Ka Committee ka la pdiang ruh sa ïa lai tylli ki Project ha ryngkat sa kiwei kiwei pat ki jingbei tyngka kiba la kot sha ka T. 577.35 klur.
