Guwahati, Nohprah:
Ka jingïalang jong ka Kynhun Myntri ba la pynlong ha Tinsukia ha ka sngi Thohdieng ka la rai na ka bynta ban pyntreikam ïa ki Project ba bun na ka bynta ki kam pynroi ha ka distrik. Ha ka jingïakren bad ki nongthoh khubor, u Myntri Rangbah jong ka jylla Assam, u Himanta Biswa Sarma u la pynbna ban buh ïa kiba bun ki jaka pynïeng kali ki ban sa long ha Thana Chariali Tinsukia khnang ban lah ban weng ïa ki jingeh kiba mih ha kaba ïadei bad kane ka bynta, ïa ka ISBT yn sa shna ha ka Bypass bad ka la pdiang ruh ban pyntreikam ïa ki jaka sangeh trok bad kumjuh ïa ka Flyover sha ka Tinsukia Medical College.
Ha kane ka jingïalang la pdiang ruh na ka bynta ka jingpyntreikam ïa ka pisa kaba T. 10 klur na ka bynta ban wanrah ïa ki kam pynroi ha Tinsukia Naupukhuri Park bad T. 2 klur na ka bynta ka Bordoloi Nagar Park kaba hap hapoh ka Tinsukia LAC. Hapoh ka Under Chabua LAC, ka Cabinet ka la pdiang ïa ka jingpyntreikam na ka bynta ban pynitynnad ha ryngkat ka jingbuh ïa ki jaka pynïaid um ne ki nala ha ryngkat ka surok na ka jaka treikam jong ka Court Tinali-DC sha Guru Teg Bahadur School.
Ha Doomdooma, yn sa shna ïa ka Indoor Stadium ha Doomdooma College ha ka jinglut kaba T. 12 klur bad sa kawei pat ka Stadium ha Doomdooma nalor ka Flyover ha Doomdooma. Hapoh ka Margherita LAC, yn sa shna bad pynbha ïa ki surok na Margherita sha Changlang Gate bad Margherita sha Namtok Ghat bad ka jingkieng kaba ban ïaid nalor ka wah Buridihing na ka shnong Jagun Katha Chena Cema-Brahmajan.
Ha Dogboi LAC, yn sa buh ïa ka Indoor Stadium ha ryngkat ka pung jngi ha ryngkat ka surok kaba 2 km na Digboi Chariali sha Borbeel. Ka jingpyntreikam na ka bynta ban shna ïa ki jaka pyntuid um yn sa leh ha Makum. Hapoh ka Sadiya LAC, yn sa buh ïa u durmot jong u Dr Bhupen Hazarika ha kaba yn sa pynïeng hajan Dr Bhupen Hazarika Setu katba ïa ka Stadium yn sa shna ha Chapakhowa bad Kakopathar. La pdiang ïa T. 5 klur na ka bynta ka BuraBuri Than bad ka jingpynbiang bording sha ka shnong Amarpur ha ka jinglut kaba T. 50 klur. U Myntri Rangbah u la pynbna ba kane ka jingpyntreikam ïa kine ki skhim kan sa dep ban treikam ha u 2026.
