Ka jingmih na ka ilekshon ha ki lai na ki saw tylli ki jylla ka pyni ïa ka jingkhlaiñ bor jong ka seng Bharatiya Janata Party (BJP) ha kane ka Ri. Ka jingjop kput ha Rajasthan, Chhattisgarh bad Madhya Pradesh ka kdew ba ka BJP ka dang dei ka seng ka bym pat lah ban shim sting da kiwei pat ki seng saiñpyrthei ha ka ilekshon MP ha u snem ban wan. Ka jingshah rem ka Congress khamtam ha Chhattisgarh bad Rajasthan kaba ka la synshar mynta la san snem ka pyni ba kane ka seng kan hap ban trei shitom shuh-shuh lada ka kwah ban wanphai biang sha ka bor ha Delhi. Mynta ka sngi, dei tang ha Telangana ba ka Congress ka la lah ban ïoh jingjop kaba donburom katba ha kiwei ki jylla, ka la shah pynliem kput ha ka BJP. Lada ka ïaineh ha kane ka rukom, khlem pep ka BJP kan wanphai biang sha ka jingsynshar ha Delhi ha u snem ban wan.
Ha ka Ri synshar paidbah, ngi donkam ïa ka liang pyrshah kaba khlaiñ ka ban peitngor ïa ka jingtreikam jong ka sorkar. Hynrei kumba ngi ïohi mynta, kiba bun kiwei pat ki seng ki hap ban mad ïa ka jingrem ha ka BJP. Ki don bun ki nongshong shnong ha ka Ri kiba kwah ban ïohi ïa ka jingshah rem jong ka BJP, hynrei kim lah leh eiei pat haba ki nongthep ‘vote’ ki dang jied ïa kane ka seng ba kan synshar. Ym dei ba ka Ri ka la ïaid beit nadong shadong hapoh ka jingsynshar ka BJP ha kine ki 10 snem ba ki paidbah ki sa pynjop beit ïa ka, hynrei ka daw ba kongsan ka long ba ki seng ha ka liang pyrshah kim da ïatylli haduh katta-katta. Hooid, lajan 30 tylli ki seng ha ka liang pyrshah ki la thaw ïa kata ka I.N.D.I.A kaba dei ka kynhun synrop ban ïakhun ïa ka BJP. Tangba kam i don pat ka jingïatreilang hapdeng jong ki ha madan jong ka jingïaleh. Lada kim lah ban ïatylli ha madan, kam don jingmyntoi ban ïa long kawei tang ha ki kotkhubor namar ka BJP ka dei ka seng kaba khlaiñ haduh katta-katta.
Kane ka jingbym ïatylli ha ka rukom kaba dei ka pynduh mynsiem shikatdei ïa kito ki nongshong shnong ki bym kwah shuh ïa ka jingsynshar da ka BJP. Ka jingpharia ki seng kiba shong ha ka liang pyrshah ka long kumba ailad pynban ïa ka BJP bad ka kynhun National Democratic Alliance (NDA) ban ïoh jingmyntoi ha ka ilekshon. Namarkata, lada kine ki seng INDIA ki kwah ban knieh ïa ka jingsynshar na ka BJP, ki dei ban pyni sha ki paidbah ba ki don shisha ka jingïatreilang hapdeng jong ki lym kumta kam don jingmut ban ïakhun pyrshah ïa u Narendra Modi bad ka kynhun jong u. Lada kam don jingïatylli kan bha ba kin shu shong noh sharud bad ailad beit noh ïa ka BJP ba kan tur shakhmat. Hynrei lada don ka jingïatylli kaba shisha, khlem pep wat ka BJP bad ka NDA ruh kin syier ban shu leh katba ki mon.
Ha kajuh ka por, ym lah ban len ba ka BJP ka nang bha ban khring ïa ki paid nongthep ‘vote’ da kaba pynmih ïa ki skhim kiba bun jait kiba ïadei naduh ka shet ka tiew, jingshna paiñkhana, jingtei ïa ki ïing na ka bynta ki baduk ha kaba ka kyrteng jong ka ïing la ai ha ka longkmie, jingpynpoi umbam umdih lyngba ka Jal Jeevan Mission (JJM), jingpynkhlaiñ ïa ki lad jingïada na ki kam pyntriem, jingsam ei ïa katto katne kilo u khaw rashon ïa ki baduk man la u bnai, bad bun kiwei pat kiba ym lah ban ïa ñiew lut hangne. Ki paidbah ki tip kham bha kiei kita ki jingmyntoi ba ka sorkar BJP na Delhi ka wanrah sha ki. Katkum ki nongpeit pyrman, la pynpaw ba kiba bun na ki kynthei bad longkmie ki la ai jingkyrshan ïa ka BJP na kawei ka ilekshon sha kawei pat namar ki skhim ba ka la pyntreikam.
Lada ki seng kiba don ha ka liang pyrshah ki shu nang tang ban beiñ ban khoh ïa ka BJP bad ïa u Modi, kham bun na ki paidbah kin ym pdiang satia. Ki paidbah ki kwah ban tip aïu kita ki seng kin leh na ka bynta jong ki lada ki wan sha ka bor synshar. Lada kim lah ban ai jingtip kaba biang, ki paidbah kim banse ban hap ban ai jingshaniah biang ha ka BJP namar ki sngewthuh ba ki ïoh jingmyntoi. Ka jinglong briew ka long kumta: uba ai jingmyntoi u dei uba bha bad u bym ai u dei uba sniew.
