Auckland, Nohprah:
Lai ngut ki dkhot jong ka kynhun lehnoh Khalistan ki la shah pynngat kyndon halor ka jingthombor ia u nongkren radio na Auckland ba la ithuh kum u Harnek Singh uba la kren pyrshah ia ki kam bad jingleh jong ki lehnoh Khalistan ha ki por ba la leit.
U Sarvjeet Sidhu, 27 snem ka rta, u la phla hi halor ka jingdon kti ha katei ka jingthmu pyniap briew, katba u Sukhpreet Singh uba la don 44 snem ka rta pat, u dei nong pynïoh ia ki tiar jingdonkam ha ka ban leh ia katei ka kam. Utei uba lai pat u dei uba la 48 snem ka rta bad uba long u nong Auckland bad kiba la ïadon kti ha ka jingiasuh buit ha katei ka kam ban pyniap ia utei u nongkren radio. Kine lai ngut ki la buh shun ia utei u nongkren radio namar ka jingkren pyrshah jong u ia ki kam thombor jong ki lehnoh Khalistan.
Hapdeng ka jingpynsngap haba iadei bad kane ka mat hapoh ka ïingbishar, u nongbishar Judge Mark Woolford u la pynpaw ia ka jingsngew khia halor ka jingjur jong ki kam thombor ha kine ki sngi bad kumta ruh u la ban jur halor ka jingdonkam ban pynkhlaiñ ia ki lad jingiada naka bynta ki jaitbynriew bapher bad kumjuh ruh ban rat dyngkhong ia ki jingisih ne jingibeiñ jaitbynriew khnang ban lait na kiei-kiei baroh.
Katei ka jingjia ka la jia ha ka 23 tarik u Nohprah jong u snem 2020, ha kaba u Harnek Singh u la shah kerkut ha kitei ki runar jong ka jaitbynriew Muslim bad u la shah dung dusmon haduh 40 tylli ki dak mong ha ka met jong u bad kaba la donkam ban suh haduh 350 ksai bad shibun tylli ki jait jingsumar ban pynkoit ia u.
