Chennai, Nohprah:
Ka sorkar DMK ka la thok pyrshah ïa ki nongrep ha kaba kam shym la lah ban pynbiang ïa ka um na ka bynta ka kam rep jong ki bad da ka jingpynbna ïa ka bailutksan kaba khyndiat eh hadien ki jingshah pynjulor jong ki jingthung jingtep, la ong u General Secretary jong ka seng AIADMK u Edappadi K. Palaniswami.
Ha ka jingai jingkren sha ki nongthoh khubor, u Edappadi uba la don ha Chennai, hadien ba u la dep ban plie paidbah ïa u mawnongrim na ka bynta ki kam pynroi, u la ong ba hashwa ban pyllait ïa ka um na Mettur dam na ka bynta ka jingsam umbam umdih sha ka thaiñ Delta ha ka 12 tarik, Jylliew jong une u snem, ka sorkar ka la dei shwa ban khmih bniah halor ka jingdonkam um bad ban pynbiang sha ki jaka rep.
“Ïa ka kam rep la pynlong ha san lak akar ka jaka kaba don ha ka thaiñ. Hynrei ka sorkar kam lah ban pynbiang um,” u la ong, ha kaba u la ong shuh shuh ba ki jingthung jingtep ha palat 3.5 lak akar ka jaka ka la sakhi ba ki la donkam khambun ka um.
“Lada dei ba u Myntri Rangbah ka jylla Tamil Nadu u M.K. Stalin u pyrkhat na ka bynta ki nongrep, u la dei ban leit ïakynduh ïa u Myntri Rangbah jong ka Karnataka bad u Myntri ba dei khmih ïa ka tnat sam umbam-umdih bad ban dawa da 10 tmc ka um na ka wah Cauvery,” u la ong.
U Palaniswami shuh shuh la ong ba ka sorkar AIADMK ka la pynbiang ka bailutksan kaba T. 1.04 lak ha ka shi hectare na ka bynta ki jingjulor jong ki jingthung jingtep, katba u Stalin u la pynbna ïa ka bailutksan kaba T. 13,500 shi hectare na ka bynta ki jingthung kiba la shah pynjulor.
U la ong ba ka jingkular jong ka seng DMK na ka bynta ban pynïoh ei da ka bos na ka bynta ki longkmie haba ki leit jing-leit kam shym la urlong naba ïa ka skhim la pynmih noh tang ïa ki bus rong ping.
