Washington, Nohprah:
U Lamphang jong ka White House National Security Council, u John Kirby, ha ka Sngi Thohdieng u la ong ba ka US ka sngewkhia shibun halor ka jingiadon kti jong ki briew na India ha ka jingthmu ban pyniap ia u nongshong shnong ka New York bad kaba lah ruh ban pynsniew noh ia ka jingiadei hapdeng ka India bad ka United States.
La ong ba ka United States ka dap da ka jingsngew khia halor kane bad u la iathuh ba ia kane ka kam yn aiti ha ka tnat US Department of Justice ban wad bniah halor ka jingshah pharep don kti jong uwei u nong India haba iadei bad katei ka jingthmu ban pyniap ia u nongialam ki Sikh kiba dawa ban ïoh ïa ka Ri Khalistan. Une u nongïalam ki Sikh u dei uba la tip kyrteng kum u Gurpatwant Singh Pannun, bad u shong u sah ha America. Haba ai jingkren sha ki lad pathai khubor ha katei ka sngi, u Kirby u la ong ba ka India ka long ka paralok ba iajan eh bad ka United States bad kumta ruh ka US kan iai bteng ia ka jingiadei paralok bad ka India kumba ka ju long.
Namarkata, u Kirby u la ong ba ka US ka kwah ban iatrei lang naka bynta ka jingbha ia ka India bad kumjuh ruh ia ka US hi, khnang ban ioh pyndep noh ia ki jingdonkam haba iadei bad kane ka mat bad ban lait ruh na kiei-kiei baroh ki jingiathud bad jingiakynad hapdeng ka India bad ka United States kumba la iohi ha kane ka por. Shuh shuh ruh u la ong ba ka US ka kyntu ia ka India ba kan shim khia halor kane ka kam bad kan iatrei lang bad ka US khnang ban poi sha u pud jong ka jingiabeit bad ka jingbha bad ban lait na ki jingiakynad hadien- habud.
Katkum ki tyllong khubor la ong ba ka iingbishar na Manhattan, ka la pynngat kyndon ia uwei u nong India uba la suba don kti bad suh buit halor ka jingthmu ban pyniap ia u nongialam ka kynhun Sikh ia kaba la lap bad ioh ban tehlakam noh da ki bor pyniaid ka US.
Katei ka tnat na US ka la iathuh ba u Gupta u don jingiadei bad u CC-1, bad la ong ba utei u nong India u donkti ha ki kam khaïi drok bad ki kam khaii tiar siat be-aiñ bad la suba ruh ba dei ma u uba la suh buit ha ka jingthmu pyniap ia utei u nong New York.
