Amaravati, Nohprah:
U Myntri Rangbah jong ka Andhra Pradesh u Y S Jagan Mohan Reddy ha ka Sngi U Blei u la ai ka jingkhublei sha ka seng Congress bad sha ka seng BJP na ka bynta ka jingjop ha ka ilekshon Assembly ha kiba bun ki jylla.
U la ai ka jingkhublei sha ka seng BJP halor ka jingjop ha ka ilekshon ha Rajasthan, Madhya Pradesh bad Chhattisgarh.
“Ka jingai jingkhublei sha ka seng Congress ha kaba ïadei bad ka jingjop ha ka ilekshon Assembly ha ka jylla kaba marjan jong ka Telangana,” la ong u Reddy ha ka jingpyllait khubor ha ka rynsan X, uba long ruh u MP barim jong ka seng Congress.
Ha kaba ïadei bad kane, ka seng Congress ha Andhra Pradesh bad ki nongkyrshan ki la lehkmen na ka bynta ka jingjop ilekshon ha Telangana.
U nongïalam jong ka seng Congress ha Andhra Pradesh u Shaik Mastan Vali ruh u la ïashim bynta lang ha kane ka jingleh-kmen ïa ka jingjop ilekshon.
U President jong ka seng Congress ha Andhra Pradesh u Gidugu Rudraraju u la ïakynduh ïa u nongïalam ka seng ha Telangana u A Revanth Reddy bad ai khublei ïa u ha Hyderabad.
“Nga la ïakynduh bad ai khublei da ka jingsngewkmen mynta ka sngi sha u President jong ka TPCC u Revant Reddy ha kum kane ka sngi jong ka jingjop don burom jong ka seng Congress ha Telangana ha ka jingïakhun ïa ka ilekshon Assembly,” la ong u Rudraraju ha ka rynsan phah khubor.
