Hyderabad, Nohprah:
Arngut ki pilot jong ka tnat shipai suiñ ne Indian Air Force (IAF) ki la ïap ha ka por ba ki don hapdeng ka kam naba ka liengsuiñ thma ka Pilatus Trainer Aircraft kaba ki shong ka la hap bad bthei ha Toopran kawei na ki jaka sor kaba don ha Medak distrik jong ka Telangana hynnin ka step, la ïathuh ki heh jong ka tnat shipai suiñ.
Kumba la ïathuh ki heh ba dei khmih, la ong ba kane ka jingjia ka la jia ha ka por 8:55 mynstep ha ka por ba ka dang don ka jingai jinghikai pyntbit ha Air Force Academy hajan Dindigul distrik. Kine ki Pilot ki kynthup ïa u nonghikai bad u nongshah hikai.
“Kane ka liengsuiñ thma ka dei kaba na Dundigul Airport. Ki la don arngut ki briew kiba la shong ha kane ka liengsuiñ thma, uwei u nonghikai bad uwei pat u nongshah hikai. Ki nongtrei jong ka Airport bad ka kynhun ba dei khmih ki la don ha katei ka jaka ba la jia katei ka jingjia. Ki kali pyllip ding ki la leit ban tem ïa ka jingklang jong ka ding,” la ong ka SP Rohini.
“Ki heh ba dei khmih, ki dang pyrshang ban pyllait im ïa kine ki shipai kiba la ngat ha kane ka apot. Ka la don ka jingkhmih bniah ban lap ïa ki met ïap na katei ka liengsuiñ thma. Ka jingtohkit halor kane ka jingjia ka dang bteng khnang ban lap ïa ka daw tynrai halor ka jinghap bad bthei jong kane ka liengsuiñ thma, la bynrap ka SP.
