Shillong, Nohprah 04
Ka Nongspung AYSCSA ka la jam sha ka semi final ha ka lympung ïalehkai First Division Football Tourna-ment ba la pynïaid da ka Tyrsad Area Sports Association (TASA) hadien ba ka la lah ban pynliem noh ïa ka Kyrphei SC da 5-1 kol ha ka jingïakhun kaba la long ha ka Lah Sngi U Blei ha madan ïalehkai kaba ha Tyrsad.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Ka Nongspung ka la ïoh ban thep kol nyngkong lyngba u Lambokstone Syiemiong ha ka minit kaba 11 na ka bynta ban tam shi kol ha ka kylla step.
Kane ka kynhun ka la pynbud biang ïa ka kol kaba ar lyngba u Lanstarwell Syiemlieh ha ka minit kaba 50. Hadien ar minit ka Kyrphei ka la la lah ban pynphai kylla shi kol lyngba u Reginal Rynjah.
Ka Nongspung ka la ïai bteng ban ïakhun tyngeh bad dei ha ka minit kaba 54 ba ka la ïoh ban thep ïa ka kol kaba lai lyngba u Firstbornson Syiemlieh. Hashwa ban wai kane ka kynhun ka la thep biang sa ar kol lyngba u Elbingstone Marweiñ (75) bad u Stanlywell Lyngdoh (81) na ka bynta ban khur syndon ïa ka jingjop.
Haba phai sha ka 2nd Division, ka Thaiñthynroh SC ka la jop da 1-0 kol ïa ka Phanniewlah Rum SC bad ïa kane ka shi kol la thep da u Bhalang Swer (55).
Katba ha ka jingïakhun jong ka 3rd Division pat la jop ka Nongbri SC da 2-0 kol ïa ka Wahumlawbah SC. Ïa kine la thep da u Bankitlang Nongbri ha ka minit kaba 3 bad ïa kawei pat la thep da u Samborlang Marbaniang (59).
Kane ka lympung ïalehkai kan bteng biang ha ka sngi Thohdieng (8 tarik) ha kaba ka jingïalehkai jong ka Third Division kan long hapdeng ka Nongthymmai Neng SC pyrshah ïa ka Raimulong SC (11AM), katba ha ka Second Division kan long hapdeng ka Madan Mawser SC ïa ka Nongwah SC ha (1PM) bad ha ka First Division kan long hapdeng ka Phudbyrnei SC ïa ka Rangshangkham SC ha ka por 2:30 janmiet.
