Shillong, Nohprah 04
Ha ka sien kaba nyngkong eh u khlur ïalehkai phutbol barim na Mizoram u Jeje Lalpekhlua u la shah jied kum u MLA bathymmai sha ka Ïingdorbar thawaiñ na katei ka jylla.
Kane la wan hadien ba u la pynliem ïa u Myntri barim ka Mizoram uba dei khmih ïa ka tnat ka koit ka khiah u R. Lalthangliana (MNF). U Jeje Lalpekhlua uba la ïakhun na ka seng Zoram People’s Movement (ZPM) na South Tuipui, u la ïoh da 5,468 vote, katba u R. Lalthangliana (Mizo National Front) u la ïoh 5,333 vote, katba u C. Laldintluanga na ka Indian National Congress u la ïoh 2,958 vote.
Ïa kane ka jingñiew vote la pynlong ha ka Lah Sngi U Blei ha Mizoram kaba la sdang naduh ka por 8 baje mynstep ha ryngkat ka jingpyrkhing ki bor pahara.
U Jeje (ïa uba la kha ha ka 7 tarik u Kyllalyngkot 1991), u la long u rangïalehkai phutbol ba paw. Une u rangïalehkai shakhmat u la mihkhmat ïa kiba bun ki klob jong ka lympung ïalehkai I-League, Indian Super League ha kaba u la ïoh ban thep bun kol bad khamtam eh na ka bynta ka Chennaiyin FC. U la mihkhmat ïa ka ri India ha kiba bun ki lympung ïalehkai shabar ri.
Hadien ba u la shongthait noh na ka kam ïalehkai naduh u snem ba la lah, u Jeje ha ka 27 tarik u Lber jong mynta u snem u la rung sha ka kam saiñ pyrthei da kaba u la pynïasoh sha ka seng Zoram People’s Movement.
