New Delhi, Nohprah:
U President ka Maldives, u Mohamed Muizzu ha ka Sngi U Blei u la ong ba ka sorkar India ha kane ka sien, ka la kohnguh ban phah mih noh ia ki shipai jongka na Maldives,
U Muizzu u la jop ia ka shuki President jong ka Maldives dei ha ka ilekshon kaba la long ha u Nailur jong une u snem 2023 bad dei tang ma u- u nongialam ka Maldives uba la phai khmat sha kane ka bynta bad uba thrang ban pynmih noh ia ki shipai India bad ki ktem shipai ka India kiba don hapoh u pud- u sam jong ka Maldives baroh shi katta.
U Muizzu ha katei ka sngi u la iathuh ba ha ka jingioh jong u ban iakren bad ki heh ka sorkar India, na ka liang ka sorkar India ka la kohnguh bad mynjur ban phah mih noh ia kitei ki shipai ka India kiba don hapoh u pud- u sam jong ka Maldives bad kumta ruh la ong ba ka India bad Maldives kin sa ioh ban iatrei lang ha kiwei pat ki kam ki ban kyntiew ia ka jinglong- jingman jong baroh arliang ri.
Namar la ong ba ka India bad ka China ki pyrshang kaba lah ban pyntur ia ki shipai jongki sha katei ka bynta jong ka Maldives, hynrei ka Maldives pat la i-kumba ka kham i-shaniah bad kham ailad ia ka China ba kan iadei kam badka.
Hynrei la ong ba kitei ki shipai ka India kiba sahkut sah hapoh Maldives haduh mynta, ki dei kiba leit ban pyniaid bad pyntreikam ia ki helicopter bad ka liengsuiñ ba la ai da ka India sha Maldives naduh ki por ba la leit.
La ong ruh ba ka India ka la ai ia katto katne ki tiar jingiarap sha ka Maldives, ban iarap haba iadei bad ki jinglynshop jong ki bor ka mariang bad haba iadei bad kane, ka India ka la ai ia 2 tylli ki helicopter bad kawei ka liengsuiñ ban ioh pyndonkam ha ka jingpyntrei bad jingtei ban pynbit- pynbiang ha katei ka bynta.
Katba na ka liang jong utei u nongialam ba thymmai ka Maldives, u Muizzu, naduh u bnai ba la lah, haba ai jingkren sha ki paidbah u la ong ba ka sorkar jong u kan ialeh ban nym ailad ia ki shipai ne ki bor ba nabar ba kin ioh ban ïadon bynta ha ki kam jong ka ri.
Kumta ruh u la kyntu ia ka sorkar India ba kan phah mih noh ia kitei ki shipai jongka na Maldives, khnang ba kan ym don jingthud ne jingktah eiei ia ka suk- ka shngaiñ bad ki kam ki jam jong ka Maldives hadien-habud.
