Ïa ki surok la shna ban suk ka leit ka wan u khun bynriew. Kaei kaba ngi ïohi da ka jingwan jong ki surokbah kum ka Shillong Bypass bad kiwei, ka jingdon jong ki briew kiba pynkylla ïa ki surok kum ki jaka ban ïalehkai da ki kali bad ki ar shaka watla ki sngewthuh ba ïa ki surok ym shym la shna na ka bynta ki nongñiah ban tynneng ïa ki tyngshop ka phlim ‘Hollywood’ ba la ai kyrteng ‘Fast & Furious’ bad kaba bun ki bynta jong ka. Namar ka jingkhyllew, ki don ki nongñiah kali bad ar shaka kiba pyni ïa kata ka jingnang ban ïaid pynkhun ne pynher ne ban rah ïa ki shaka shalor bad kumta ter-ter. Ha Meghalaya, ngim pat don jaka ban pynïalehkai da ki kali bad ar shaka watla ki don kiba tbit ha kane ka liang. Lehse kita kiba smat ban lehkai kumne, ki dei ban leit dawa na ka sorkar u Conrad K Sangma bad na u Bah Prestone Tynsong, uba dei u Myntri ba peit ïa ka tnat shna surok, ban shna da ka surok bakyrpang na ka bynta jong ki khnang ba kin lah ban leh katba ki mon khlem da pynthut ïa kiwei pat ki nongleit nongwan.
Ka jingñiah lymmuh ïa ki kali bad ar shaka bunsien ka ïalam sha ki jingjia ba sngewsih. Lada kita kiba ñiah thurmur ki mynsaw tang ïalade, kam da pher than namar i kumba ki ïa pan kwah hi. Hynrei kaba sangsot ka long ba ki pynmynsaw ïa kiwei kiba lui-lui bad kiba shu jia ryngkhat ba ki dei ban ïaid lynti na kato ka jaka. Bunsien kine kiba pyrshang laiphew jait laiphew skit ban lehkai da ki kali bad ki ar shaka ki ju leit kham shajngai na sor Shillong. Don bun kiba ngat ha ki jingmynsaw ruh bad ki pynthut shikatdei ïa ka leit ka wan jong kiwei pat. Ha Shillong, kiba kwah ban leh khyllah da ki kali bad ar shaka ki kham mih ha ka por mynmiet ynda la kynjah ka shnong ka thaw. Tangba lada dei ha sor ne shawei, ki surok ki dei na ka bynta ban ïaid ban ïeng ki kali ha ka rukom kaba dei bad ka bym ktah ïano-ïano. Ki surok kim dei ban kylla long ki madan ïalehkai kai namar ïa kiba kum kita ki surok, ki don da kiwei watla ha Meghalaya kim pat shna satia.
Ngi dei ban kynmaw ba namar ka jingñiah thurmur, bunsien ki jingtakhuh kali ki wan jia khamtam ha surokbah. Ha u snem 2022, katkum ka khanasamari na ki pulit, ha Meghalaya ki la don 205 tylli ki jingjia takhuh kali bad ha kine ki jingjia haduh 138 ngut ki briew ki la duh noh ïa la ka jingim bad 212 ngut ki la mynsaw. Lehse ym baroh na kine ki jingjia ki dei namar ka jingleh khlem akor ki nongñiah tangba ngim artatien ba kham bun ki dei namar kata ka daw. Shisien ba la ïoh ñiah kali saw shaka lane ar shaka, don kiba sngew hieng ba kat ma ki te ym don shuh ha kane ka sla pyrthei bad tang ma ki kiba nang lane tang kiba ma ki kiba don hok ban ïaid na kato ka surok. Ha surokbah pat, ki trok ki sngew ba ki dei kum ki syiem bad ki ïaid katba ki sngewbit. Dei hangta ba bunsien ki mih ki jingjia takhuh kali kiba bun rukom. Kiba ngat ha ka apot na kawei ka liang, bunsien ki dei kiba lui-lui bad kiba ïaid ha la ka jong ka lynti.
Ngim dei ban kheiñ kai ïa ka jingim jong kiwei watla ngi lah ban ym da kheiñ kor than ïa la ka jong ka jingim. Ki surok ki dei na ka bynta baroh ban ïa ïaid ha ka rukom kaba dei bad da kaba bud ryntih ïa ki aiñ ñiah kali. Lada baroh ngin ïaleh katba ngi sngewbit ha lynti syngkien, khlem pep kin sa mih bun ki jingjia ba sngewsih. Ngi dang donbok ba kiba bun hi ki dei ki briew kiba sngewthuh ïalade bad ïa kiwei ruh kumjuh bad namarkata, ngi kham lait na ki jingjia kiba lah ban wanrah ïa ka jingïap ne jingmynsaw ha surok. Ka jingim ka long ka bakordor bad kiba ñiah kali/ar shaka thurmur ki dei ban sngewthuh ba kim don hok ban shim ïa ka jingim jong no-jong no. Tang namar ka jingleh thurmur jong ki, ka ïing ka sem ka duh noh ïa u kpa lane ka kmie bad ki nongkamai. Long kiba jai-jai bad adkar ha ka ïaid ka ïeng khnang ban ïa biang lang baroh.
Ka dei ruh ka kamram jong ki pulit ban pahara ha ki surok bad ki lynti ki syngkien kiba ki nongñiah ki kham juh ban ïalehkai da ki kali/ar shaka. Dei ban kem beit ïa ki bad set along khnang ba kan long kum ka jingsneng na ka bynta kiwei bad khamtam eh ban pyllait na ki jingjia kiba sngewsih. Ka jingïada ka kham kordor bad kham kongsan ban ïa ka jingpynkhiah. Nangne shakhmat, ki nongshong shnong ruh ki dei ban sei la ki jong ki ‘Mobile Phone’ bad ban ring da ki dur khih ïa kito kiba ñiah kali thurmur bad ban pyntip sha ki pulit. Dei ban ring ha kata ka rukom ba yn lah ban ithuh ïa ki nombor jong ki kali/ar shaka.
