Kyiv, Nohprah:
Ki heh ka Ukraine ha ka Sngi Nyngkong ki la kynnoh ba ki shipai ka Russia ki la pynkheiñ biang ia ka aiñ thma da kaba siat pyniap ia ki shipai ka Ukraine kiba la pyndem ialade hadien ka jingshah pynhap suloi bad jingshah ker tawiar ha ki shipai ka Russia.
Ha kawei ka dur khih kaba la saphriang da ki shipai ka Israel ha kane ka por, la ong ba la iohi ia uwei u shipai ka Ukraine uba mih na kawei ka thliew bad uba la rahkti bad pyndem noh ialade hakhmat ki shipai ka Russia, katba don pat sa uwei uba shu dem khohsiew hangta hajan. Hynrei la ong ba ki shipai ka Russia pat kim shym pynsngap ia kitei ki 2 ngut bad ki la siat iap ia ki hangta hajuh ha ka jaka ba ki don.
Katba, la ong ba ym pat lah ban pyntikna ia katei ka jingjia la ka long kaba dang shu dep jia shen ne kaba la naduh mynno ruh hynrei na ka liang ka tnat iada jong ka Russia ruh kam shym la pynphai ktien eiei haba iadei bad katei ka jingjia.
Hynrei haba iadei bad ka jingkynnoh ba ka Russia ka la pynkheiñ ia ki aiñ thma, ka Russia ka la kyntait halor katei ka jingkynnoh bad ong ba ka Russia kam shym pynkheiñ kyndon eiei kumba la kynnoh da ka Ukraine. Katba ka Ukraine pat ka la kdew kti khlem sangeh ban kynnoh ba ka Russia ka la pynkheiñ aiñ thma na ka por sha ka por.
Katba, u heh ka tnat iada jong ka Ukraine ha katei ka sngi u la ong ba ka jingsiat pyniap ia kito kiba la pyndem ialade, ka long ka jingpynkheiñ aiñ thma.
Kumjuh ruh ha u Lber, ka la don kawei ka video kaba la saphriang ha kaba uwei u shipai ‘Sniper’ jong ka Ukraine, u la shah siat iap tang mar ia dep kren ia ki kyntien ‘Glory to Ukraine’ lane ‘Slava Ukraini’, kaba mut ‘Ka jingjop kan long jong ka Ukraine’.
