Ranchi, Nohprah:
U Myntri Rangbah jong ka Jharkhand u Hemant Soren ha ka Sngi Palei u la pynpaw ka jingsngew skhem ba ka kynhun synrop INDIA kan sa jop ha ki 13 tylli na ki 14 tylli ki konstitwensi ha ka jingïakhun ïa ka ilekshon Lok Sabha 2024 na ka jylla.
U la ong ba ka seng jong u, ka Jharkhand Mukti Morcha (JMM), ka la ïeng skhem ha kane ka kynhun synrop.
Ha ka por ba u la ai jingkren sha ki nongbud jong ka seng JMM na Chatra, Palamu, Latehar, bad Garhwa distrik, u Soren u la ong, “Ngi na ka kynhun synrop INDIA, ngi la sdang ban pynkhreh bha ha kaba ïadei bad ka jingïakhun ïa ka ilekshon Lok Sabha. Ngi don ka jingkyrmen ba ngin sa ïoh ïa ka jingjop ha ki 13 na ki 14 tylli ki konstitwensi hapoh ka jylla.”
U la ong shuh shuh, “ka seng JMM ka la ïeng skhem hapoh ka kynhun synrop INDIA bad ym donkam ban da khuslai ne artatien shaphang kane.”
Ka jingkheiñ sngi na ka bynta ka jingshah pynkhyllem jong ka sorkar National Democratic Alliance (NDA) ka la sdang bad ïa kane yn sakhi ha kaba ïadei bad ka jingïakhun ïa ka ilekshon Assembly kaba la dep, la ong u Soren.
U Myntri Rangbah u la pynshisha ba ka seng Bharatiya Janata Party (BJP) hapoh ka jingïalam jong u Myntri Rangbahduh u Narendra Modi kan sa khyllem namar ki jingkular kai kaba ka la khlei sha ki paidbah, bad ki paidbah kin sa pyni ïa ka lynti ba ka dei ban mih ha ka jingïakhun ïa ka ilekshon Lok Sabha ka ban sa wan.
