Aizawl, Nohprah:
Ki la don kumba 68 ngut ki briew, kynthup ïa ki 11 ngut ki kynthei, kiba la ïap na ka daw ba ki la pyndonkam bakla ïa u drok ha Mizoram haduh u Naiwieng jong une u snem, la ïathuh ki heh ba dei khmih. Ki heh jong ka Excise and Narcotics Department hapoh ka jylla ki la ïathuh ba u Heroin u la long u jingdih ba shyrkhei uba la shim ïa ka jingim jong ki briew ha Mizoram.
Ka jingdon jong ki briew kiba la ïap na ka jingpyndonkam bakla ïa u drok ka la long 43 ngut ha u snem ba la dep bad 47 ngut ha u snem 2021, la ïathuh ki heh ba dei khmih, ha kaba ki la bynrap shuh shuh da kaba ong ba ka jingdon jong ki briew kiba la ïap ha bakut une u snem 2023 na ka daw jong ka jingdih drok, kan sa nangkiew shuh shuh.
Ka jingjia ha ka sien kaba nyngkong jong ka jingïap briew na ka daw ka jingshah ktah ha u drok ha Mizoram, kaba long ka jylla kaba la paw ha ka jingdon ki kam khaïi drok ha kiba bun ki rukom bad kumjuh ka jingwan jong ki song u drok na Myanmar, ka la paw ha u snem 1984.
Ki la don baroh kumba 1,804 ngut ki briew, kynthup ïa 218 ngut ki kynthei, kiba la ïap na ka daw jong ka jingpyndonkam bakla ïa u drok ha ki 39 snem ba la leit, kata kaba la long naduh u snem 1984. Ka jingdon jong ki nongpyndonkam bakla ïa u drok ha Mizoram ka la poi ha ka bynta kaba la ap jingma ha kaba ki la don kumba 139 ngut kiba la ïap ha u snem 2000, katba ka jingdon bun jong kiba la ïap na kum kane ka jingjia ka la long da 143 ha u snem 2004.
Hapdeng u Kyllalyngkot bad u Risaw jong une u snem, kiba bun na ki kynhun ba dei khmih bad ki kynhun tohkit, kynthup ka Excise and Narcotics Department, ki la ïoh ban kurup haduh 76.22 kilo u Heroin. Baroh ka jingïoh kurup ïa u Heroin ka la long 33.4 kilo ha u snem ba la lah. Nalor u Heroin, la don ruh sa kumba 148.46 kilo u Ganja (Cannabis), 78.82 kilo u Methamphetamine, bad kiwei pat ki jait drok, nalor kaba bun ka kyiad. Ïa ka kyiad la dep ban khang ha ka ban pynmih, ban dih bad ban die ha ka jylla Mizoram da bun bun snem.
