Shillong, Nohprah 04
Ki nongmareh ka Jylla ki la wan shakhmat ha ka jingïakob mareh kaba 52 km ha Kaziranga ha Assam kaba la long ha ka 3 tarik mynta u bnai.
Ïa kane ka jingïakob mareh kaba la tip kum ka Ultra Run la pynlong kum shi bynta ban ïalap bad pynsngewthuh paidbah halor ka jingdonkam ban ïada ïa ki kyndad bad la ai kyrteng “Run for the Rhino”. Ha kane ka jingmareh, ki la don ki nongïashim bynta na ki 17 tylli ki jylla jong ka Ri bad kumjuh ruh na Ri Japan bad Bangladesh.
Na ka jylla Meghalaya ki la don bun ngut kiba la leit ban ïashim bynta. Ha ka jingmareh kaba 52 km kiba la wan shakhmat ha ka liang ki kynthei ki kynthup ïa ka Darishisha Ïangjuh kaba la wan ha ka kyrdan nyngkong bad ka Kong Rephica Becky Pde kaba la wan ha ka kyrdan ba saw.
Ha ka liang ki shynrang, u Bah Tlanding Wahlang u la wan ha ka kyrdan ba nyngkong, katba u Bah Ranbok -star Wanñiang u la wan ha ka kyrdan ba saw.
Nalor kitei ki la don ruh ki nongmareh na Jylla kiba la ïashim bynta ha ka jingmareh kaba 10 km bad 26 km.
Lah ban kdew ba kitei ki nongmareh kynthei bad shynrang kiba la wan shakhmat ha Kaziranga ki dei kiba la ju ïashim bynta teng ha kiba bun ki jingmareh thong ha kylleng ka Ri. Na ka por sha ka por ki la ju wanrah nam bad burom ïa ka Jylla.
Ki nongmareh kiba ju ïashim bynta ha kiba kum kine ki jingmareh kiba jngai ki hap ban kilan met jan man la ka sngi da kaba mareh da ki phew kilometre. Ka jingtrei shitom jong ki ban poi sha ki kyrdan ba shalor ka dei kaba kiba bun ba lang kim ju kham ïohi. Watla katta ki ïai tur shaphrang ban wanrah nam bad burom ïa ka Jylla.
