Bangkok, Nohprah:
Katkum ka khubor na ki heh ka Hamas ha ka Sngi Nyngkong, la ong ba katei ka kynhun lehnoh ka thmu ban pyllait noh ia 6 ngut ki nongshong shnong ka Thailand kiba la shah rahbor naduh ba sdang jong ka thma ha u Risaw.
Namar la ong ruh ba ki don da ki hajar bad phew hajar ngut ki nong Thailand kiba sah bad kiba trei hapoh Israel, khamtam ha ki laiñ ka rep- ka riang. Hynrei ha ka por ba ki lehnoh Hamas ki leit ban hiar thma ia ka Israel, ki la rah bad kit ia kat kiba suk ban ioh rah khlem tip shuh la ki dei ki jong ka Israel ne kiba na kiwei ruh ki ri. Katkum ka jingiathuh kyllum jong ka Hamas, la ong ba ka la ioh ban rahbor kumba 240 ngut ki briew ha katei ka jingleit thombor jong ki sha Israel ha ka 7 tarik u Risaw jong une u snem 2023. Napdeng kitei kiba shah rahbor baroh, kumba 32 ngut ki dei ki nong Thailand.
Kumta, ki lehnoh Hamas ha kane ka kynti ki la pynti ba ha ka Sngi Nyngkong ha ka por kumba 2:00 Nohphai Sngi, kin sa pyllait noh sa ia kitei ki 6 ngut kiba long ki nongshong shnong ka Thailand.
La ong ba ki don kumba 30,000 tam ki nong Thailand kiba im bad kiba trei ba ktah hapoh Israel haduh ka por ba ki Hamas ki leit ban hiar thma ia ka Israel ha ka 7 tarik jong u Risaw ba la leit.
Ki don ruh kumba 40 ngut ki nong Thailand kiba la khlad hapdeng ka thma bad kumba 19 ngut pat kiba la ngat bad mynsaw na katei ka thma hapdeng ki lehnoh Hamas bad ka Israel.
