Guwahati, Nohprah:
Uwei u nongkhaïi drok u la shah pynïap bad san ngut kiwei pat kynthup ïa u pulit, ki la mynsaw ha ka por ba ka la don ka jingsiat pyrshah ïa ka kynhun jong ki nongkhaïi drok ha Agiathuri hajan Amingaon ha Kamrup distrik ha ka Sngi U Blei.
Kumba la ïathuh u Kalyan Kumar Pathak, uba long u Additional SP jong ka Kamrup, u la ong ba haba ki lai ngut ki nongkhaïi drok ki la thmu ban ïaid lyngba ka Agiathuri ha kawei ka kali kaba remdor, ki pulit, hapoh ka jingïalam jong u Kalyan Kumar Pathak, ki la buddien ïa katei ka kali.
Kine ki nongkhaïi drok ki la siat ïa ka kynhun jong ki pulit na kane ka kali ba ki shong, ha kaba kane ka la pynmynsaw ïa u pulit langrut u Hima Das.
Na ka liang jong ki pulit ruh ki la pynphai kylla ïa ka jingsiat bad ïoh ban pynïap ïa uwei napdeng kine ki nongkhaïi drok, ïa uba la tip kyrteng kum u Salam jong ka Hatigaon, Guwahati, bad pynmynsaw ïa arngut kiwei pat ki nongkhaïi drok, ïa kiba la tip kyrteng kum u Hiranya Thakuria bad u Faijul Haque.
Arngut kiwei pat kiba dei ki nongshong shnong jong kane ka thaiñ ki la mynsaw na ka daw jong ka jingdon ka jingïasiat hapdeng ki ar kynhun.
Ïa kine ki arngut ki nongshong shnong kiba la mynsaw la tip kyrteng kum u Nur Islam bad u Rebati Bharali.
Ïa kine kiba la mynsaw la pynkit sha Narayana Hospital bad hadien kane la pynkynriah noh ïa ki sha GMCH.
Ki pulit haba ki la pynlong ka jingkhmih bniah na katei ka kali, ki la ïoh ban kurup ïa kawei ka pla kaba la dap da u drok.
