Jowai, Nohprah 14
Ka Ladthadlaboh SC ka la jam sha ka final ha ka lympung ïalehkai Super Division Football Tournament na ka bynta u Kiang Nangbah Memorial Trophy 2023 ba la pynïaid da ka West Jaiñtia District Sports Association (WJDSA).
Kane ka la wan hadien ba ka Ladthadlaboh ka la pynliem noh ïa ka Sailung Ïalong da 1-0 kol ha ka semi final kaba nyngkong (Qualifier) kaba la long ha ka lah sngi U Blei ha Kiang Nangbah Stadium kaba ha Jowai.
Haba phai sha ka jingïalehkai ka la long kaba ïathain bha bad baroh arliang mamla ki la ïa ñion markylliang ban ïoh thep kol, dei haduh ka minit kaba khatduh ba u Promi Suting jong ka Ladthadlaboh ula ioh ban thep kol ha ka minit kaba 90+1 bad kane ka la biang pura ïa ka Ladthadlaboh ba kan khur syndon ïa ka jingjop.
Ka semifinal kaba ar (eliminator) kan long ha ka 5 tarik mynta u bnai hapdeng ka Niaw Wasa pyrshah ïa ka Nangbah Mulang.
Kiba jop na kane ki jingïakhun kin ïa aireng bad ka Sailung Ïalong ha ka semi final kaba lai ka ban long ha ka 9 tarik mynta na ka bynta ban ïaknieh ïa ka nam lahduh mynta ka aïom.
