Shillong, Nohprah 04
Ka Khasi Authors’ Society (KAS) ka la kynthoh ïa ka Sorkar Jylla halor ka jingtlot bad jingsuki ban phah shithi sha ka tnad kam pohïing ka Sorkar Pdeng kum ka jingbuddien ïa ka jingdawa ban pynrung ïa ka Ktien Khasi ha ka Khyrnit Baphra ka Riti Synshar ka Ri.
“Hadien ba ngi la wan na Delhi (jingïakhih ha Jantar Mantar), ngi la leit ban ïakynduh ïa u Myntri Rangbah ban dawa pynlong Ktien Sorkar noh ïa ka Ktien Khasi, ha kajuh ka por ban thoh sha u Myntri ka tnad kam pohïing ka Sorkar Pdeng ban pynkhreh ïa ka ‘Official Bill’ na bynta ban wanrah jingkylla ha ka Khyrnit Baphra ban pynrung ïa ka Ktien Khasi bad nalor kiwei-kiwei ki jait ktien,” la ong u President ka KAS, Dr. D.R.L. Nonglait ha ka Lah Sngi U Blei.
U la ong ruh ba u Myntri Rangbah u la kular ban leh ïa kaba donkam bad haba ïadei bad ka shithi buddien halor ka jingdawa ka seng – ban wanrah ïa ka ‘Official Bill’ ha kane ka Dorbar, u Myntri Rangbah u la bthah ïa ka seng ban pynkhreh ïa ka shithi bad na ka liang ka Sorkar kan shu pynbiang tang ïa ki bynta ba long kongsan (Official) ha shuwa ban phah ïa ka ha ki taïew ban wan (hadien katei ka jingïakynduh).
“Wut-wut ngi la pynkhreh ïa kata ka shithi, ngi la leit ai ha ophis jong u, hynrei haba buddien na kawei ka taïew sha kawei, ka shithi kam mih…haduh kane ka taïew ba la dep, ngi dang buddien biang. Ngi la kynjoh sha PS u Myntri Rangbah bad la ong ba ki dang peit ban pynbit pynbiang ïa ka shithi,” la ong u Dr. Nonglait.
“Mynta ka ïew ka la plie, uta uba mut ban leit ïew um leit haduh ban da khang ka ïew…ka la long kumba ong u Khasi – ‘Khleiñ la thang, jwat la bam’,” kynthoh u President.
Haba ban biang ba ka dei ka jingsuki na ka liang ka Sorkar Jylla wat hadien ba ka KAS ka la ai ka jingïatreilang, u Dr. Nonglait u la ong ba Myntri Rangbah u la dei ban phah mardor ïa ka shithi kumba la kular, hynrei wat haduh mynta, ka shithi kam leit.
“Ngim don ka jingrit mynsiem ne jingduh jingkyrmen, ngi la ong ba lada ka Sorkar kam leh eiei, ngin sa shim kiwei pat ki sienjam ban pynjur ïa ka jingdawa tat haduh ba ka Ktien Khasi kan ïoh rung ha ka Khyrnit Baphra,” u la ong.
Haba kylli, u la ong ba ka CEC kan sa shong pyrkhat bad hadien yn sa pynlong ïa ka General Council ban pyrkhat ïa ki sienjam bad ki rukom ïakhih.
“Kan ym long shuh tang hapoh ka Jylla hynrei kan long bad kiwei-kiwei ki seng kiba don kajuh ka jingdawa na bynta ban pynrung ïa ka ktien Khasi ha ka Khyrnit Baphra,” la ong utei u nongïalam.
Ha kawei ka liang, u la ïathuh ba ka dorkhas kaba ka seng la phah sha ka tnad kam pohïing ka Sorkar Pdeng ha shuwa, ka long kaba kham eh ha kane ka kynti bad kumta ka tnad kam lah ban ai kano-kano ka jubab haduh mynta.
“Ka jingdawa ka long ban wanrah ïa ka ‘Official Bill’ ha ka sien shong Dorbar kaba bud, bad kane ka sdang mynta ka sngi. Ka Sorkar Pdeng ka ïoh por tang kumba 2 bnai duna ban shim ïa ki sienjam na bynta kane. Imat kam pat shym la long kaba la kloi ban leh ïa kata namar kam pat shym don lypa ïa ka jingmut ban wanrah jingkylla ha ka Khyrnit Baphra jong ka Riti Synshar ka Ri,” u la ong.
Shuh shuh haba jubab, u la bynrap, “Kata ka long kaba shai, na ka liang ka Sorkar Jylla, ngi ïohi ba ka tlot haduh katta-katta, na ka liang ki MP ruh ki tlot, ka jingïatreilang hapdeng ki MP bad ka Sorkar Jylla ruh kam da don, ki ïaid la ka jong bad don hi ruh ki bym da shimkhia ïa kane.”
