New Delhi, Nohprah:
U President jong ka seng Congress u Mallikarjun Kharge hynnin ka sngi u la kyntu ïa ka sorkar kmie ba ka la dei ban pynbiang ïa baroh ki jingdonkam sha ki jylla kiba la shah ktah jur na ka jingkhie jong ka ‘erïong ‘Michaung’.
Ha ka jingphah khubor jong u ha ka rynsan X, u Kharge u la ong ba ka long kaei kaei kaba ktah mynsiem haba sakhi ïa ka jingshah ktah jur na ka jingkhie ka ‘erïong ha Tamil Nadu, ha kaba ki la don ki mynsiem briew kiba la duhnoh.
Ka ‘erïong mynta kumba la khmih lynti la ong ba kan sa beh sa sha ki bynta jong ka jylla Andhra Pradesh, Odisha bad Puducherry, bad kane kan sa pynjur slap ha Jharkhand.
“Baroh ki sorkar jylla ki la dei ban ïoh ki lad jingïarap bad jingkyrshan na ka sorkar kmie ha kum kine ki kynta ba ki donkam. Ngi la dei ban ïatreilang khnang ban lah ban weng ïa kino kino ki jingeh,” la ong u heh nongïalam jong ka seng Congress.
Ha kaba ïadei bad ka jingong ba ka jingshngaiñ ïa ki briew ka dei ka bynta kaba hakhmat eh, u la buh ka jingkyrpad ïa ki nongbud jong ka seng Congress ba kin ai ka jingïarap sha ki para dkhot bad kumjuh sha ki paidbah kiba ïakynduh jingeh kum ha kane ka por.
U President barim jong ka seng Congress u Rahul Gandhi u la pynpaw ka jingsngewlem halor ka jingkhlad noh jong ki mynsiem briew na ka daw jong ka jingkhie ka ‘erïong.
