Bangkok, Nohprah:
Ha ka Sngi Ba-ar la ong ba kawei ka bos ka la kum leit tynrah ia uwei u dieng ha ka nongbah Bangkok ha kaba 14 ngut ki nongleit jingleit ki la khlad ha shen bad kumba 20 ngut pat ki la ngat bad mynsaw lang ha katei ka jingjia.
Kane ka la jia ha ka phang Sepngi jong ka nongbah Prachuap Khiri jong ka ri Thailand ha ka por shiteng miet, ha kaba la iohi ia ka bynta ba shakhmat jong katei ka bos kaba la kad arliang bad jot rathai hadien katei ka jingleit tynrah beit- beit ia utei u dieng uba don harud katei ka surok.
Kumta la ong ruh ba ki briew jong ka kynhun iarap ki la leit ban sei ia kitei ki nongleit jingleit kiba shong hapoh jong katei ka bos bad ki bym lah shuh ban mih shabar ka bos namar ki jingmynsaw ba ki la ngat na kaba tyngkhuh bad dei ha ki bynta bynta bad ki tiar kiba don hapoh jong katei ka bos.
Ia baroh kito kiba la mynsaw la pynkit noh sha ka hospital kaba don ha katei hi ka thaiñ naka bynta ki jingsumar kiba bniah. Ki pulit ki la iathuh ruh ba ka jingtohkit kan dang iaid shakhmat ban wad ia ka daw jong katei ka jingleit tynrah jong katei ka bos ia utei u dieng ha ka por shiteng miet ka bym dei shuh ka por kaba bun ki kali kum ha ka por mynsngi.
