New Delhi, Nohprah:
U Lakhbir Singh Rode, uba long u heh jong ka kynhun lehnoh kaba la shah ñiew beaiñ ka Khalistan Liberation Force (KLF) bad jong ka International Sikh Youth Federation, u la khlad noh ha Pakistan.
U Rode u la shah buh kyrteng ha ka thup jong ki lehnoh hapoh ka jingtreikam jong ka Unlawful Activities (Prevention) Act bad u la sah ha Pakistan hadien ba u la phet rieh na India.
Une u lehnoh uba la phet rieh na ka ri uba la 72 snem ka rta u la khlad noh na ka daw ka jingkem pang kynsan na ka jingthut treikam u klong snam. Une u la long u pyrsa jong u lehnoh Khalistani uba la shah pynïap u Jarnail Singh Bhindranwale.
U para jong u Lakhbir Singh Rode bad u Akal Takht Jathedar barim u Jasbir Singh Rode u la pyntikna halor kane ka khubor.
Hadien ba u la khlad, la pyndep ïa ki rukom niam bad burom khatduh ïa ka met u Lakhbir Singh Rode bad la thang noh ha Pakistan, la ong u Jasbir.
Hashwa kane, kata ha u bnai Risaw, ka ïingbishar bakyrpang jong ka kynhun National Investigation Agency (NIA) ha Mohali kaba don ha Punjab ka la hukum ba la dei ban dawa ïa ka jaka kaba dei jong u Lakhbir Singh hapoh ka jingtreikam jong ka kyndon 33 (5) jong ka Unlawful Activities (Prevention) Act.
Ka ïingbishar ka la pynsangeh shwa ban buh jingmudui halor ka mukotduma kaba long pyrshah ïa u Rode ha ka 1 tarik, Risaw, 2021, halor kiba bun ki jingshah kynnoh kiba la shah pynhap hapoh ka kyndon 3, 4, 5 & 6 jong ka Explosive Substances Act 1908; ki kyndon 16, 17, 18, 18B, 20, 38 & 39 jong ka UA(P) Act 1967, ka kyndon 21B, 27A, 29 jong ka NDPS Act 1985, bad ka kyndon 120B jong ka IPC.
