Ka jingmih na ka ilekshon ha Telangana bad Mizoram ha kaba ki sorkar kiba la synshar 10 snem ki la shah pynliem ka pyni ba ki jingkylla ki wan watla kin kham shimpor. Ka BRS hapoh ka jingïalam jong u ‘KCR’ lane u K Chandrashekhar Rao ka la synshar ïa ka Telangana la 10 snem katba ka Mizo National Front (MNF) ba la ïalam da u Zoramthanga ka la synshar 10 snem ha Mizoram. Ka seng Congress ka la wan sha ka bor ha ka sien banyngkong eh ha Telangana bad u Revanth Reddy un long kum u Myntri Rangbah. Ha Mizoram, hadien bun snem jong ka jingïakylliang ïa ka bor synshar hapdeng ka Congress bad ka MNF, ka Zoram People’s Movement (ZPM) kan ïoh ban synshar ha ka sien banyngkong bad u Lalduhoma un long kum u Myntri Rangbah bathymmai ha ka rta kaba 74 snem. Lada ka Congress ha Telangana bad ka ZPM ha Mizoram kim lah ban ai ïa ka jingsynshar kaba bha ha kine ki san snem ban wan, lehse ki paidbah kin sa kyntait noh ïa ka.
Kine artylli ki ilekshon ki dei ki nuksa na ka bynta kiwei pat ki jylla kiba la shah synshar bun snem tang ha kawei ka seng. Ngim dei ban duh mynsiem namar kan sa poi ka por ba ki paidbah kin ngiah noh ïa kato ka seng saiñpyrthei kaba la synshar lynter bad kin jied noh da kawei. Hynrei don ruh pat kum ka jylla Madhya Pradesh, Gujarat, Odisha bad West Bengal kiba ki paidbah kim i kwah ban pynkylla ïa ka synshar ka khadar bad ki kmen haba ki shah synshar wat haduh 20 snem ha kijuh ki seng. Ngin ong kumno pat ïa ki paidbah ha kine ki jylla ki bym kwah jingkylla? Ka long ka jingshisha ba ki paidbah kim kwah ban kyntait noh ïa kano-kano ka sorkar kaba ki sngewthuh ka ai jingïarap ïa ki. Don ki sorkar kiba nang ban treikam ha kata ka dur ban pynsngewtynnad tang shiliang ki nongthep ‘vote’. Don ki sorkar kiba ha ka por ilekshon ki ïaid ha ka kyrteng jong ka niam bad jaitbynriew ban ïoh jingkyrshan. Don ki sorkar kiba ieid tang ïa ki briew kiba dei na kawei ka niam bad ym kiwei pat bad namarkata ka shitom ban pynkhyllem ïa ki.
Ngim lah ban len ba ka niam bad ka saiñpyrthei ki don ka jingïadei kaba jan haduh katta-katta, bad ki dang don bun bah ki paidbah ha kane ka Ri kiba thep ‘vote’ ha ka kyrteng jong ka niam. Ka long kaba ma haduh katta katta namar ka pynpait ïa ki paidbah lada ïaid ha ka sur jong ka niam. Tang ki ’riew saiñpyrthei kim salia ban leh ïa kane ruh na ka daw ba ki hap ban jop ilekshon. Tangba la jop, la biang bad kam pher lada ïapait ïapra hapdeng ki nongshong shnong ha ka kyrteng jong ka niam. Ngi lah ban ong ba ha India hi, ka niam ka la longdoh longsnam ha ka saiñpyrthei bad ka nang jur kat nang mih ki snem. Ngin sa peitkai ha ka ilekshon MP ka ban long ha u snem 2024 bad ngin sa ïohi shai kdar haduh katno ka niam kan ktah ïa ka rukom thep ‘vote’ jong ki nongshong shnong.
Don kiba la dep pynpaw ba ka BJP kan jop biang ha ka ilekshon MP Lok Sabha 2024 namar ka la jop lypa ha ki lai tylli ki jylla kiba kham heh – Madhya Pradesh, Rajasthan bad Chhattisgarh – dang shen. Ym lah pat ban batai kumno ki paidbah ha kiwei ki jylla ki sngew. Ka dang long kloi palat ban ïa ñiom sha ka khana ba ka BJP ka la jop lypa naduh mynta. Ki seng kiba don ha ka liang pyrshah kin hap ban ïa trud khlieh bad ban wad ïa ki lad ki lynti kumno ban leit sha ki paidbah bad ban pan jingkyrshan na ki. Hynrei lada kine kim lah ban pyni da kawei pat ka lynti jong ka jingsynshar hakhmat ki paidbah, kam don jingmyntoi ban ïakhun pyrshah ïa ka BJP. Ka BJP kaba mynta kam dei shuh ka BJP kaba ngi ïohi ha ki snem ba mynshwa. Ki don ki nongïalam mynta kiba shyrkhei palat ban ïakhun bad ban jop ha ki ilekshon. Kiba kum kita ki nongïalam kim don pat ha kiwei ki seng saiñpyrthei. Lada ngi pule ïa ki jingthoh jong kiba bun halor ka rukom ïakhun ilekshon ka BJP, ngin sa sngewthuh balei ka long kaba eh ban pynkhyllem ïa ka ha ki ilekshon.
Watla katta ruh, ym ju don ba lah ban synshar sah ha ka Ri jylla. Kan don beit ka por bad ka ïa ha kaba ki paidbah ki ai da kawei ka rai. Ngi la ïohi ïa kine ki jingkylla ha ka Ri ha u snem 2004 ha ka por ba ki paidbah ki la weng noh ïa ka BJP na ka bor bad ha u snem 2014 haba ki nongthep ‘vote’ ki la pynrem kput ïa ka seng Congress bad kiwei pat bad da kaba pynjop biang ïa ka BJP. Ka por kan sa batai ïa kiei-kiei baroh bad ki paidbah kin sa ai ïa ka jubab ka jong ki. Mynta kaei kaba kongsan ka long ïa ki seng saiñpyrthei bad ki paidbah ban pynkhreh na ka bynta ka ilekshon MP Lok Sabha ka ban long ha u Ïaïong-Jymmang 2024.
