Agam, Nohprah:
Katkum ki khubor la ong ba ka jingdon jong kiba khlad na ka jingbthei u Lum mihding hapoh Indonesia ka la kiew sha ka 13 ngut hadien ba ki tnat iarap jong ka Indonesia ki la ioh ban sei sa 2 tylli ki metiap ha ka Sngi Ba-ar.
U heh jong ka tnat Padang Search & Rescue Agency, u Abdul Malik ha ka Sngi Ba-ar u la iathuh ba ka jingdon jong kiba khlad tad haduh kane ka khyllipmat ka long 13 ngut baroh. Katba 10 ngut nalor jong kine, ki dei kiba dang jah rngai naduh katei ka sngi ba bthei u Lum mihding ha katei ka jaka. Kumjuh ruh ia kiwei pat ki 52 ngut la ioh ban pynkynriah noh sha ki jaka kiba kham shngaiñ.
Ia ka met jong kitei ki 2 ngut pat la ioh tam ha ka miet Sngi Nyngkong, hadien ka jingiakhun shitom jong ki tnat iarap ban tih bad bud dien wat hapdeng ka jingkhriat bad ka jingsniew jong ka suiñ bneng ha kine ki 2-3 sngi mynta.
La ong ba ki dpei kiba mih na utei u Lum mihding ki la hiar lut sha kjat jong utei u lum, bad kaba la wanrah jingeh ia ka kynhun jong ki tnat iarap ba kin tih bad wad ia kitei kiba khlad bad kiba shah tap ha ki kynrum- kynram ha katei ka jaka ba la twa bad julor bad kaba la shah tap ha ki dpei kiba mih na utei u Lum.
Ia ki 11 ngut ki nongkiew lum ba la khlad, la lap bad ioh tam ha ka Sngi Nyngkong najan jong u lum Mount Marapi jong ka dew lynnong Sumatra. Katba ia kiwei pat kiba dang lait im, la shem na katei hi ka jaka bad la ialam noh ia ki sha trai jong utei u Lum bad la pynkynriah noh sha ki jaka kiba shngaiñ.
Utei u Lum mihding ha ka Sngi U Blei u la bthei bad kynshait ia ki dpei uba don napoh shaduh kumba 3,000 Metre shalor suiñ bad kham shajrong shuh- shuh ban ia ka rynieng jong utei u lum ruh.
Ka kyntien ‘Mount Marapi’ ka mut ‘U Lum Ding’ bad utei u lum u dei uba khlaiñ tam ban bthei ne mih ding na baroh ki Lum mih ding kiba don ha katei ka thaiñ Sumatra.
La ong ruh ba ka Indonesia ka ju ioh mad bha ia ka jingbthei ki Lum mih ding bad ka daw ka long namar ba ka Indonesia ka don ha ka bynta ba don ka Pacific ‘Ring of Fire’.
Katei ka ri ka don kumba 130 tylli ki Lum mih ding kiba dang treikam bad kiba ju bthei na ka por sha ka por.
La ong ba utei u Lum mihding ‘Mount Marapi’ uba don ha ka dew lynnong Sumatra, u don kumba 2,891 Metre (9,484 phut) ka jing jrong, u la bthei ha ka Sngi U Blei, ha kaba ki la mih ki um ding na utei u Lum bad kiba kynshait haduh kumba 3,000 metre shajrong suiñ ha katei ka sngi.
Katkum ka jingkheiñ ba la buh kyllum, ki don kumba 26 ngut ki nongkiew lum ha katei ka thaiñ shuwa ban bthei utei u Lum mihding, hynrei ki bor pyniaid ka Indonesia ki la lah ban shem tang 14 ngut napdeng kitei baroh, ha kaba 3 ngut ki dei kiba dang lait im bad 11 ngut pat ki la khlad noh ha ka jingtwa bad jingtuid ki lum thah ha katei ka thaiñ lum jong ka Indonesia.
Shuh shuh ruh la ong ba ki don 75 ngut ki nongkiew lum ha ka Sngi Saitjaiñ, ha kaba 12 ngut ki la jah rngai noh bad 49 ngut pat ki la hiar bad khlem leit kiew shuh namar ka jing bym ibiang ia ka jinglong ka suiñ bneng naduh katei ka sngi.
