Shillong, Nohprah 05
U Myntri Rangbah ka Jylla u Conrad K. Sangma u la kular ban mang ïa ka bhah pisa na ka bynta ban kylliang noh da uwei pat u phlang plastik ha madan ïalehkai phutbol kaba ha Third Ground, Polo.
Kane la wan hadien ba ki dkhot ka Meghalaya Football Association (MFA) hapoh ka jingïalam u Bah Hamletson Dohling kum u President, ki la leit ban ïakynduh ïa u Conrad hapoh ka kamra treikam ka jong u ha ka sngi Ba-ar.
Kane ka madan ïalehkai ka dei kaba la prat lynti nyngkong eh da ka FIFA na ka projek ‘Win in India With India’ ha ka jinglut kaba T. 6 klur na ka bynta ban siang da u phlang plastik ha ka sien kaba nyngkong eh hapoh ka Jylla ha u snem 2011 bad mynta ka la dei sa ka pali jong ka Sorkar Jylla ba kan leh eiei ïa kane ka madan.
“Ngi sngewkmen ba na ka liang u Myntri Rangbah ka Jylla u Conrad Sangma u la kular ban mang ïa ka bhah na ka bynta ban pynlut ha ka ban maramot pynbna ïa ka madan Third Ground, kaba long ka madan ïalehkai kaba la donkam ban pynbha noh ïa ka,” la pynpaw u Bah Hamlet haba ïakren bad u nongthoh khubor.
Ha kane ka sngi ki dkhot ka MFA ki la aiti ïa ka dorkhas ha u Myntri Rangbah halor ka jingdonkam ban maramot pynbha noh ïa katei ka madan kaba la don mynta kumba 12 snem kynthih naduh ba la siang ïa ka.
Naduh ba la siang da u phlang plastik ha u snem 2011, katei ka madan ka la sei ïa shibun ki nongïalehkai phutbol kiba ïoh ban ïalehkai na kiba bun ki klob ka Jylla bad ruh don ruh kiba la leit ïalehkai ha kylleng jong ka ri India.
Hapoh katei ka madan la pynlong ïa bun ki lympung ïalehkai naduh ki khynnah bad wat haduh ki kyrdan ïalehkai jong ki ‘senior’ kiba kynthup ïa ka Hero Under-18 I-League, I-League (qualifier), Natio-nal Sub-Junior Boys Tournament, Meghalaya State League, Shillong Premier League, 2nd North East Olympic, Reliance Foundation Youth Sports Tournament, nalor ki jingkilanmet jong ki klob bapher bapher.
Hapoh katei ka dorkhas ka MFA ka la pynpaw shai da kaba ong, “Kat kum ka por, ban pyndonkam ïa ka madan phlang plastik ka long tang phra snem, hynrei mynta ka la ïaid haduh 12 snem kynthih naduh ba la siang ha u snem 2011.”
Nalor ka jingmaramot ïa ka madan ïalehkai, ka MFA ka la buh ruh ka jingkyrpad hakhmat u Myntri Rangbah na ka bynta ban pynbna ïa ki kamra khreh jong ki nongïalehkai, ki rephri, ban tei ïa ki jaka shong jong ki paidbah nongpeitkai (sitting gallery) bad ka jingker baroh sawdong.
Kumba ka long mynta katei ka madan kaba la long trai da ka MFA, ka la long kaba rim bha ha kaba wat ki nongïalehkai ki la shem jingeh ban ïalehkai namar ka la long kaba eh palat bad na ka liang ki bor pynïaid ki la hap ban shu syrdep ïa ka na ki bynta kiba la jot la pei. Ym tang katta ha ka por ba slap jur, la hap ban pynsangeh ïa ki jingïalehkai phutbol na ka daw ba katei ka madan ka la dap um bad wat ki thliew ki ban tuid ka um ki la sep lut.
