Kathmandu, Nohprah:
Ka Nepal ha ka Sngi Ba-ar, ka la kyntu ia ka Russia ban ym pynrung kam shipai ia ki nongshong shnong jong ka hapoh jong ka tnat shipai Russia bad nangta ruh ka la kyntu ia ka Russia ba kan phah noh ia kino-kino ki shipai Nepal kiba trei bad ka Russia lada don kiba kum kita. Ka Nepal ka la leh ia kane hadien ba la ioh jingtip ba ki don kumba 6 ngut ki shipai Nepal kiba don hapoh ka tnat shipai Russia, kiba la khlad noh hapdeng ka jingiakhun thma bad ka Ukraine.
Ki shipai Nepal, ba ju khot kum ki Gurkhas, ki long kiba la bna nam namar ka jingshlur bad ki rukom iakhun ba kyrpang jong ki, bad ki la ioh ban iatrei lang bad ki tnat shipai jong ka Britain bad ka tnat shipai India hadien ka jingioh lait luit jong ka ri India ha u snem 1947 hapoh ka jing-iakut ban iatrei lang jong kitei ki 3 tylli ki ri.
Namar la ong ba ka Nepal kam shym la don kano-kano ruh ka jingiateh soskular bad ka Russia ban pyntrei ia ki shipai jong ka, hynrei dei tang bad ka China bad India ba ka leh kumta. Namar kata la ong ba ka jing pyndonkam jong ka Russia da ki shipai jongka Nepal ka long kaba be-aiñ khamtam ba ka jingleit hiar thma jong ka Russia ka long pyrshah ia ka Ukraine, ka ri kaba dang rit bad ka bym pat kot bor ban ialeh pyrshah ia ka lada ym dei da ka jingkyrshan jong kiwei pat ki para marjan ri.
Ka Sorkar Nepal ha kane ka kynti, ka la iathuh ba ka la ioh jingtip shaphang ki 6 ngut ki nongshong shnong jongka, kiba la shah pynrung kam shipai ha ka Russia bad kiba iakhun naka bynta ka Russia hynrei kiba la khlad noh hapdeng ka jingiakhun thma jong ka Russia bad ka Ukraine kaba la sdang naduh u Rymphang jong u snem ba la leit.
Ha kajuh ka por ruh ka sorkar Nepal ka la pan ia ka jingpynshai na ka sorkar Russia bad ka la bthah ia ka Russia ba ka dei ban pynpoi noh mar-mar ia ka met jong kitei ki 6 ngut ki nongshong shnong jongka kiba la khlad noh bad kumjuh ruh la ong ba ka Russia ka dei ban siew da ka bai lut ksan sha ki bahaiing- hasem jong kitei kiba khlad baroh.
La ong ruh ba ki don da ki Million ngut ki paid nongshong shnong ka Nepal kiba la trei kum ki nong bylla ha kiwei ruh ki ri khamtam ha south Korea, Malaysia bad ha Middle East.
