Shillong, Nohprah 05
Ka Meghalaya Sport Climbing & Mountaineering Association (MeSCMA) ka la pynbna ïa ki kyrteng jong ki 13 ngut ki khynnah kiew lum ki ban mihkhmat ïa ka Jylla sha ka IMF North East Zone Sport Climbing Competition ka ban long ha IHCAE, Chemchey, Sikkim naduh 7 haduh 10 tarik mynta u bnai.
Kane ka la wan hadien ba ka la lah ban pynlong ïa ka prokram jied ïa ki khynnah (trial) ha ka 2 tarik mynta u bnai bad pynbud ruh ïa ka prokram ai jinghikai kaba ar sngi ha ka 4 bad 5 tarik hashwa ba kin mih na kane ka nongbah ha ka sngi Ba-ar ban leit sha katei ka jingïakop. Ïa kane ka kynhun la kyrshan lang da ka tnat ïalehkai jong ka Sorkar Jylla.
Ki kyrteng ki nongïalehkai ha ka Women Open Category ki kynthup ïa ka Valarie Suchiang (Shangpung), katba ha ka Men Open Category ki long u Ricky Rani (shnong Swer) & u Balawan Habor Rynjah (Pdeng Raid Border Area Secondary School). Ha ka Sub Junior Girls ki long ka Dadapbiang Lyngdoh (Upper Lumparing), Pynkmenlang Lyngdoh (Upper Lumparing) & Ibadarisuk Kynjai Sohshang (Mawprem). Ha ka Sub Junior Boys ki kynthup ïa u Mebandonlang Umsong (Lyngkyrdem), Bhabok Nongkhlaw (Upper Lumparing) & Givensamson Lyngdoh (Mawkyrwat).
Ha ka Junior Boys ki long u Leadingstar Kharbudon (Laitlyngkot), Kyrmenskhem Lyngdoh (Upper Lumparing), Shaiphar Nongkhlaw (Upper Lumparing) & Teibanbha Rani (Lad Mawphlang).
Ki dkhot ka synjuk kiba kynthup ïa ka Kong Kayleigh Petra Nongkynrih, Bah Bakordor Umsong, Bah Teimiki Sungoh bad Kong Ibakordor Shisha Mary Sawian kin long kum ki nongbishar (judge, route setters and belayer), katba ka Kong Hunlin Lyngdoh kum ka manager jong kane ka kynhun.
Na ka liang ka synjuk ka la khublei ïa u Commandant jong ka 58 GTC, Happy Valley uba la shah ïa ki dkhot ka synjuk lem bad ki khynnah ba kin leit pyntbit ïalade ha ka ‘climbing wall’ hashwa ban mih na ka nongbah ban leit sha katei ka jingïakop.
