Shillong, Nohprah 05
Ka Shillong Lajong FC kan pynkhreh ïa ka jingïa -lehkai ha la ïing jong ka lympung I-League pyrshah ïa ka Churchill Brothers FC ha ka sngi Balang ha SSA Stadium, Polo ha ka por 2 baje janmiet.
Ha ka jingïalehkai ba la long shabar na la ïing, ka Lajong ka la lah ban pynïakhaid mar shi kol pyrshah ïa ka Rajasthan United. Te kumta kane ka kynhun ïalehkai na nongbah ka la don ha ka kyrdan ba saw bad kamai 13 point na ki hynñiew sien ïakhun.
U coach ka Shillong Lajong u Bah Bobby L Nongbet u la pynpaw ba ka kynhun ka la long ba la pynkhreh na ka bynta kane ka jingïakhun watla ka Churchill Brothers ka long ka kynhun kaba kynsai.
Ha kawei pat ka liang ka Churchill Brothers hapoh ka jingïalam u coach uba na Argentina u Edgardo Malvestiti, ka la don ha ka kyrdan khyndai bad kamai 9 point hadien ba ka la jop ar sien, ïakhaid ar sien bad shah rem lai sien.
Na ka liang u Edgardo u la pynpaw ba ka kynhun jong kan pyrshang ban ïalehkai bha ha kane ka jingïakhun pyrshah ïa ka Lajong, kaba don ïa ki nongkyrshan ba radbah.
