Shillong, Nohprah 05
U rangbah uba ju sngewtynnat ban mareh mara-thon bad uba la ïoh khur bun ki jingjop ha ka ïakob mareh, u Bah Badon Sing Tham u la wan ha ka kyrdan ba nyngkong ha ka Goal India Limited Guwahati Half Marathon kaba la long ha ka 3 tarik mynta u bnai ha Guwahati.
Une u nongmareh ba shong ba sah ha Mawlai, uba la mihkhmat ïa ka Meghalaya Police, u la lah ban pyndep ha ka por 39 minit, 42 sekhon ha ka jingïakob mareh kaba 10K jong ka kyrdan rta ïakob kaba 50 haduh 59 snem rta. Katba u Ramesh Chamlegi u la wan ha ka kyrdan ba-ar bad u Brig. Hari Kirpal Singh u la wan balai.
Ha ka Open Category, u nongmareh ka Jylla u Teiboklang Biam na ka shnong Sabahmuswang, West Jaiñtia Hills, u la wan ha ka kyrdan balai hadien ba u la lah ban pyndep ha ka 1 kynta, 11 minit & 38 sekhon. Ïa ka kyrdan ba nyngkong la jop da u nongmareh jong ka Indian Army bad ba-ar na ka Assam Rifles.
Ha ka 10K, ki kynthei jong ka kyrdan rta 50-59 la wan nyngkong ka Kong Ibameri Shullai, ba-ar ka Soniya Sharma bad balai la khur da ka Vihaya Gupta.
Ha ka 10K jong kiba 40-44 snem jong ki kynthei la wan nyngkong ka Bandana Baruah, ba-ar ka ‘thei na ka jylla ka Benita Nongrum bad balai Basanti Sonar.
Ka ‘thei na ka jylla ka Starina Jasain ka la wan ba-ar ha ka jingïakob mareh 21K ha ka kyrdan rta ba 50 snem shaneng.
Katba ha ka ïakob mareh 10K jong ki kynthei kiba ha ka kyrdan rta ba 25-29, la wan nyngkong da ka Sangita Bordoloi, ba-ar ka Tarali Phukan bad balai ka ‘thei na Meghalaya ka Dakahi Kyndait (kaba la mihkhmat ïa ka Megha-laya Police).
Ha ka 60-69 jong ka 10K la wan nyngkong u James Tamang uba na Meghalaya, ba-ar u Uday Rai bad balai u Arabinda Deka.
Ha kane ka Half Marathon ki la don palat ïa ka 5000 ngut kiba la poi ban ïashim bynta haka 21K, 10K bad 5K ha ki kyrdan rta bapher bapher. Kiba duna dkhot met ruh ki shim bynta ha ka 5K bad ki don ruh haduh 800 ngut ki kynthei kiba la ïashim bynta.
Ïa kane ka Half Marathon ha Guwahati la pynlong da ka Indian Army ryngkat bad ka sorkar Assam.
Kiba wan nyngkong ha ka 21K ki long u Nazeem Pulikkal na ki shynrang bad ka Phurba Tamang na ki kynthei.
I meirad Kmoin Wahlang ruh i la poi shim bynta ha kane ka jingïamareh bad i la ïoh ïa ka jingjop ha ka kyrdan rta jong i.
