Shillong, Nohprah 06
Ka Shillong Lajong FC ka la jam sha ka kyrdan balai ha ka miej kheiñ poiñ jong ka lympung ïalehkai I-League hadien ba ka la lah ban pynliem noh ïa ka Churchill Brothers da 2-0 kol ha ka sngi Balang ha SSA Stadium, Polo.
Kane ka nam jop ka la wan urlong lyngba u Laiwang Bohham lem bad u rangïalehkai shapdeng na Brazil, u Renan Paulino de Souza.
Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang ha kaba ki la ïoh katto katne ki kabu kiba biang, hynrei kim shym la lah ban thep kol.
Hashwa ban kut ka jingïalehkai jong ka kylla step, ka Lajong hapoh ka jingïalam u Bah Bobby L. Nongbet ka la ïoh ban pynkhih jar nyngkong eh lyngba u Laiwang Bohham ha ka minit kaba 44 na ka bynta ban tam shi kol.
Hadien ba la bteng ïa ka jingïakhun jong ka kylla miet, ka Lajong ka la pynbud biang ïa ka kol kaba ar lyngba ka penalty ba la shut da u de Souza ha ka minit kaba 51 na ka bynta ban tam 2-0 kol.
Da kine ki ar kol ka la pynlong ïa ki rangïalehkai ka Lajong ban dangïai bteng ha ka ban ïakhun tyngeh shuh shuh. Kumjuh ki rangïalehkai ka Churchill ki la pyrshang ban ïakhun tyngeh, hynrei haduh kaba kut kam shym la lah ban pynphai bad ka la mad ïa ka jingshah rem kaba saw ha kane ka lympung.
Lyngba kane ka nam jop, ka Lajong kaba la kamai 16 point na ki phra sien ïakhun, ka dangduna sa tang lai point ïa ka kynhun ba khlaiñ bor na Kolkata ka Mohammedan Sporting, kaba la bat ïa ka kyrdan ba hakhlieh, katba ka Churchill ka dangïai sah ha ka kyrdan ba khyndai bad 8 point.
Kumba ka long mynta ka Lajong ka dang long ka kynhun kaba khlem pat shah rem ha kane ka lympung ha kaba ka la khur jingjop saw sien bad ïakhaid saw sien.
Te kumta ka Lajong kan pynkhreh sa kawei pat ka jingïakhun ha la ïing pyrshah ïa ka Aizawl FC ha ka 10 tarik mynta u bnai.
