Shillong, Nohprah 06
Ka jingïalang jong ka Games Technical Conduct Committee (GTCC) na ka bynta ban pynkhreh ïa ka 5th Meghalaya Games 2024, ka la neh haduh saw kynta ha ka Sngi Balang hapoh ka shlem treikam jong ka Meghalaya State Olympic Association (MSOA) kaba don ha JN Sports Complex, Polo.
Ïa kane ka jingïalang la pynïaid da u Bah John F. Kharshiïng, Working President ka MSOA & Chairman ka GTCC ha kaba la ïadon lang u Bah Finely L. Pariat, General Secretary ka MSOA & Member Secretary ka GTCC, Bah Païa B. War Nongbri, Asst Director ka tnat ïalehkai bad kiwei.
Ka jingpynlong ïa kane ka jingïalang ka long hadien ba ki 18 tylli ki synjuk ïalehkai ki la phah ïa ki kaiphod na ka bynta katei ka lympung ka ban sdang naduh 15 haduh 20 tarik u Kyllalyngkot jong u snem 2024 ha Tura.
Kane ka jingïalang jong ka GTCC kan sa phah ïa ki kaiphod sha ka Organising Committee na ka bynta ban bishar bniah bad ban ïoh ruh ka jingmynjur ha ka por kaba biang.
