Agam, Nohprah:
Katkum ki khubor la ong ba ki kynhun iarap jong ka Indonesia haduh ka Sngi Balang ruh ki dang iakhun ban wad ia uwei u nongkiew lum uba dang jah rngai naduh ba jia ka jingbthei u lum mihding ha ki khyndiat sngi ba la leit. Ha kane ka jingjia 22 ngut la shem ba ki la khlad noh hapdeng ka jingtwa, jinghap bad ki jingjia bapher bapher ba ki mad na ka jingbthei utei lum mihding uba don ha katei ka thaiñ ba ki leit ban kiew.
La ong ba ha ka Sngi U Blei, utei u Lum Mount Marapi uba don ha ka dew lynnong Sumatra u la bthei bad kynshait ia ka um ding ne ‘Lava’ kaba mih napoh jong utei u lum shaduh kumba 3,000 metre shalor suiñ bad kham palat ruh ia ka rynieng jong utei u lum. Ha katei ka Sngi U Blei, ki don kumba 75 ngut ki nongkiew lum bad nongleit shang kai pyrthei kiba leit ban kiew ia kitei ki lum ha katei ka jaka bad napdeng kitei baroh, 22 ngut ki dei kiba la dep lap ia ka metiap na ki bynta bapher bapher jong utei u lum ha kine lai sngi mynta.
Da ki spah ngut ruh ki dkhot jong ka kynhun iarap, ki la leit ban iakhun bad wad ia kitei kiba ngat ha katei ka apot bad jah rngai bad kumjuh ruh ban leit pyllait im noh ia kitei kiba sahkut ha katei ka jaka naduh ba jia katei ka jingjia ha ka Sngi U Blei.
Ki heh ka tnat iarap jong ka Indonesia ki la iathuh ba la don shibun ki jingkren bad ki khubor hamsaia narum- naneng haba iadei bad katei ka jingjah rngai jong kitei ki nongkiew lum, hynrei u la ong ba haduh ka Sngi Balang ruh ym pat shym la lap ia utei uwei uba dang jah rngai naduh katei ka sngi ba bthei utei u Lum mihding ha katei ka jaka.
Wat haduh katei ka Sngi Balang ruh la ong ba utei u Lum uba la buh kyrteng da u ‘Lum jong ding’, u dang don hi ia ki dak jong ka jingkhluit bad jingthnam namar dang lah ban iohi ia ka tdem kaba mih na kliar jong utei u Lum wat haduh katei ka sngi kaba lai hadien ka jingbthei jong u.
