Shillong, Nohprah 06
Ki ar ngut khlur ïalehkai Mixed Martial Arts ka Jylla kin pynkhreh ban ïashim bynta ha ka WFC Yolo Carnival ka ban long ha madan Kurkalang kaba ha Bhoirymbong ha ka 15 bad 16 tarik u Nohprah 2023.
Kine ki kynthup ia u Johnny Nongrum, u Babit Kharsahnoh lem bad shiphew ngut kiwei pat ki ban pynkhreh ban kiew rynsan ha katei ka jingïakop.
Kane ka long ka sien kaba nyngkong eh ba kine ki nongïalehkai Mixed Martial Arts ka Jylla kin ïoh ban pyni ïa la ki sap ïalehkai ha katei ka tamasa ka ban kynthup lang ïa ki prokram bapher bapher kum ka put ka tem na ki nongrwai ba pawnam ka Jylla bad kumjuh kylleng jong ka thaiñ shatei lammihngi lem bad ka jingpyni ïa ki jingïakop ñiah thuk thuk.
Haba ïakren bad ki nongthoh khubor ha ka sngi Ba-ar, u Sambor Lyndoh uba dei u Head Coach jong ka Revolution u la ïathuh ba ha kane ka jingïakop yn wan ïashim bynta da 12 ngut ki nongïalehkai MMA ka Jylla pyrshah ïa ki nongïalehkai ki ban wan na kylleng jong ka ri lem bad kiba nabar ri kum na Bangladesh bad kiwei.
“Kane ka long kaba sien kaba nyngkong eh ban pynlong ïa ka lympung ïalehkai ha kane ka Jylla bad kane ka long ban plie lad ïa ki nongïalehkai ka Jylla ba kin ïoh ban pyni ïa ki sap ïalehkai ba kyrpang.”
Ha katei ka jingïakhun u khlur ïalehkai ba paw ka Jylla u Johnny Nongrum un pynkhreh ban ïakhun pyrshah ïa u rangïakehkai MMA na Madhya Pra-desh u Farid Khan, katba u Babit Kharsahnoh (TCA Combat Academy) un ïakhun pyrshah ïa u Avinash na Guwahati.
U Bah Sambor u la ïathuh ruh ba u Kisan Bareh un ïakhun pyrshah ia uwei u rangïalehkai na Bangladesh, u Fivestar Bareh ïa u Nazareth, uba dei u nongïalehkai kickboxing barim na Mizo-ram, u Jonnybor un ïakhun pyrshah ïa u rangïalehkai na Hill Saiden Academy u Depak, katba ka samla Genevive Pakma kaba la long tang marwei ka ‘thei ïalehkai ka Jylla ka ban ïakhun pyrshah ïa ka nongïalehkai kaba na Mizoram.
Ha kane ka jingïakhun yn kynthup lang ruh ïa uwei na ki rangïalehkai uba don jingduna ha ki dkhot met un pynkhreh ban ïakhun pyrshah ïa uwei na ki rangïalehkai na Assam.
Watla u Shadul Islam u bym don ïa shilliang ka kjat ka diang, hynrei un pyn-khreh ban ïakhun pyrshah ïa uwei u rangïalehkai uba biang ha ka met ka phad uba napoh ka jylla Assam.
Kumba ka paw kum kine ki nongïalehkai kiba don jingduna ha ki dkhot met ki ju ïoh ban ïashim bynta ha ki jingïalehkai kiba la buh kyrpang tang na ka bynta kiba duna ïa ki dkhot met, hynrei ki bor pynïaid ki la ailad ïa u ba un ïashim bynta lang ha katei ka tamasa.
