Tel Aviv, Nohprah:
U Myntri Rangbahduh ka Israel, u Benjamin Netanyahu ha ka Sngi Balang u la ther tyngeh ia ki tnat jong ka ‘International Human Rights Organisations’, ki tnat ba dei khmih halor ka jingshah ñion beiñ ki kynthei bad kumjuh ruh ia ka United Nations halor ka jingsngap mynthi jong ki haba iadei bad ka jingshah leh bor bad jingshah batbor ki kynthei ka Israel ha ki lehnoh Hamas.
Haba ai jingkren sha ki heh ka ri Israel ha katei ka sngi, u Netanyahu u la ong ba kito ki tnat ba dei khmih kyrpang ia ka jinglong- jingman bad jingshah ñion beiñ ki kynthei ruh ki sngap mynthi ha kane ka sien wat haba la iohi ia ka jingleh don bor jong ki lehnoh Hamas pyrshah ia ki kynthei jong ka Israel ha ka por ba ki wan tur sha Israel ban rahbor ia ki paidbah nongshong shnong jongka.
Kumta, utei u nongialam ka Israel u la buh jingkylli ia kitei ki tnat baroh da kaba ong ba hato kim iohi mo ia ki jingshah lehbor bad jingshah batbor dusmon jong ki kynthei nong Israel ha ki lehnoh Hamas, hato kim iohi ia ka jingshah rahbor bad jingleh bym kheiñ snep jong katei ka kynhun lehnoh ia ki paidbah ka Israel ha kane ka por bad balei ba kine ki tnat baroh ki jah lut bad kim nud wat tang ban ang shi kyntien ruh.
Namarkata, u Netanyahu u la pynpaw ia ka jingbitar halor kane ka bynta bad ong ruh ba u khmih lynti ia ki nongialam jong ki ri bad ki tnat bapher jong ka pyrthei, ba kin kren eiei halor kane ka bynta bad ba ka jingsngap mynthi jongki ka long ka jingai mynsiem bad jingkyrshan ia kitei ki lehnoh Hamas wat haba ki la leh ia kat kitei ki kam runar bad ki kam kiba long pyrshah ia ka hok long briew- man briew.
U Netanyahu u la kren ia kane hapoh ka jingialang bad ki lad pathai khubor kaba la pynlong ha ka nongbah Tel Aviv ha ryngkat ka jingiadon lang jong u Myntri ka tnat iada u Yoav Gallant bad u Benny Gantz.
