Khliehriat, Nohprah 06
Ka Sutnga, Rymbai Shkenshynriah, Khliehriat West bad Rymbai Ïawpynsing ki la jam sha ka semi final jong ka lympung ïalehkai Super Division Football Tournament ba la pynïaid da ka East Jaiñtia Hills District Football Associa-tion (EJHDFA).
Ïa ki jingïalehkai ba khatduh jong kane ka aïom ïalehkai Super Division la pynlong ha ka sngi Balang ha ki saw tylli ki madan ïalehkai kiba don hapoh ka District.
Ha ka jingïalehkai kaba nyngkong kaba la long ha madan Wapung-skur SSWO, ka Rymbai Shkenshynriah ka la jop da 1-0 kol ïa ka Dhana SC. Ïa kane ka shi kol la thep da u Hikaidame Bareh ha ka minit kaba 56.
Ha ka jingïalehkai kaba la long ha madan Teilang Phawa Dkhiah West, ka Thangskai Tiger ka la pynliem da 2-1 kol ïa ka Rymbai Wah-shnong SC. Ïa ki kol jong ka Thangskai Tiger la thep da u Pynthymme Rymbai ha ka 44 bad u Sooki Syrti ha ka minit ba 90+2. Katba ïa ka shi kol jong ka Rymbai Wahshnong la bakla thep da u rangïa -lehkai ‘dien jong ka Thangskai Tiger ha ka minit kaba 78.
Ha ka jingïalehkai kaba bud kaba la long ha madan Chiehruphi hapdeng ka Sutnga SSCC bad Khliehriat West ki la kut ha ka jingïakhaid hadien ba kin shym la lah ban pynkhih jar.
Haka jingialehkai kaba la long ha madan EJDSA artificial Dieng-shynrum, Khliehriat, ka Rymbai Ïawpynsing ka la jop da 2-1 kol ïa ka Molamanoh. Ïa ki kol jong ka Rymbai la thep da u Hesmiki Rymbai ha ka minit kaba 24 & 59. Katba ka shi kol jong ka Moolamanoh la thep da u Kiming Dkhar ha ka minit kaba 65.
Ïa ki jingïakhun semi final yn pynlong ha ka dur jong ki lai tylli ki semi final kata ka Qualifier Round 1, Eliminator Round bad Qualifier Round 2.
Ka jingiakhun Semi Final Qualifier kaba nyngkong kan long hapdeng ka Sutnga SSCC pyrshah ïa ka Rymbai Shkenshyn -riah ha ka 9 tarik mynta u bnai ha ka por 1 baje nohphai sngi. Katba ka jingïakhun Semi Final Eliminator kan long hapdeng ka Khliehriat West pyrshah ïa ka Rymbai Ïawpynsing.
