Shillong, Nohprah 07
U Mohamed Salah u la khmih lynti ban khur ïa ka hat-trick na ka bynta ka khusnam jong ka African Player of the Year hadien ba u la paw biang ka kyrteng kum uwei napdeng ki lai ngut ki rangïalehkai kiba la don ha kane ka thup ha ka sngi Palei.
Kiwei pat ar ngut ki rangïalehkai ki ban ïaknieh ban ïohpdiang ïa kane ka khusnam mynta u snem ki long u Achraf Hakimi bad u Victor Osimhen.
Katba kiwei pat ar ngut ki rangïalehkai ki bym shym la paw hapoh kane ka thup mynta u snem ki long u Sadio Mane bad u Riyad Mahrez. Kine ki la leit ïalehkai mynta u snem sha ka klob kiba ha Saudi Arabia.
Na ka bynta ka khusnam jong ki kynthei ki long ka ‘thei ïalehkai kaba la khur haduh san sien kata ka Asisat Oshoala kan ïaknieh ryngkat ka Thembi Kgatlana bad ka Barbra Banda.
Ka Confederation of African Football ka la pynbna ïa kitei ki rangïa-lehkai ki ban ïaknieh ïa kitei ki khusnam ha Marrakech, Morocco.
Kane ka jingthep vote kan long hapdeng ki technical committee jong katei ka synjuk ïalehkai na Africa, ki lad pathai khubor, ki kapten bad ki coach jong ki kynhun ialehkai ka ri Africa, kumjuh ki klob, la ong ka CAF.
U Salah uba long u khlur ïalehkai ka Egypt u la bteng ban khur ïa katei ka khusnam naduh u snem 2017 bad ’18 hashwa ba u para nongïalehkai barim ka Liverpool u Mane un ïohpdiang ïa katei ka khusnam na ka bynta ka aïom ïalehkai 2019 bad 2022. U Salah u la wan ba-ar ha u snem ba la lah.
U rangïalehkai ‘dien ka Paris Saint-Germain u Hakimi u dei u rangïalehkai uba la ïadon bynta lang bad ka kynhun ïalehkai ka Morocco kaba la rung semi final ha ka World Cup 2022.
U rangïalehkai sha-khmat na Nigeria u Osimhen, u la long u rangthep kol ba kynsai ka Napoli ha kaba u la ïoh ban thep haduh 26 kol bad u la lah ruh ban pynurlong na ka bynta ban rah ïa ka nam lahduh ha ka Serie A ha ka sien nyngkong ha ki 33 snem.
Katba u Mane u la ïakynduh jingeh ha ka aïom kaba nyngkong ha Bayern Munich bad u la duh ïashim bynta ha ka World Cup na ka Senegal na ka daw ka jingmynsaw, u Mahrez u la don hapoh ka kynhun ïalehkai ka Manchester City kaba la khur ïa ka nam lahduh ha ka Champions League, English Premier League bad ka FA Cup.
U Mahrez u dei u rangïalehkai uba la ïohpdiang ïa ka khusnam African player of the Year ha u 2016 hadien ba u la lah ban pynurlong ïa ka Leicester ban khur ïa ka nam lahduh ha ka lympung ïalehkai ha England.
Haba phai sha ka Oshoalawon ka dei ka ‘thei ïalehkai kaba la khur ïa ka khusnam African Women’s player of the Year ha u 2022 bad hadien ka la ïarap ïa ka klob ka jong ka (Barcelona), ban khur ïa ka jingjop ha ka Women’s Champions League hashwa ba kan leit ïalehkai ha ka Women’s World Cup na ka Nigeria.
Ka Kgatlana, kaba ïalehkai na ka bynta ka Racing Louisville ha United States, ka la long ka ‘thei ïalehkai jong ka South Africa ban ïashim bynta ha ka World Cup bad ka Banda ka la shimti kum ka kapten ïa ka Zambia ha kane ka lympung kaba la pynlong ha Australia bad New Zealand.
